iklan

EKONOMIA, BAUCAU, HEADLINE, MUNISÍPIU

BTL Baucau rekolla reseita rihun $23.827

BTL Baucau rekolla reseita rihun $23.827

Responsável BTL munisípiu Baucau, Adriana Belo da Rosa. Imajen Tatoli/Natalino Belo.

BAUCAU, 07 novembru 2022 (TATOLI) – Bee Timor-Leste, empreza públika (BTL,ep) munisípiu Baucau, hahú hosi fulan-janeiru to’o outubru tinan 2022 rekolla reseita hamutuk rihun $23.827.

Responsável BTL, ep munisípiu Baucau, Adriana Belo da Rosa, esplika, BTL,ep hahú eziste iha Baucau hosi fulan-janeiru tinan-2022 ne’ebé to’o agora konsege rekolla reseita ne’ebé mai hosi tarefa hosi kliente sira inklui rejistrasaun kliente.

“Hafoin sosializa, ita halo melloramentu oituan nune’e iha fulan-jullu tama kedas ba tarifaria,” Responsável BTL,ep munisípiu Baucau informa Agénsia Tatoli iha Vila Nova, segunda ne’e.

Hosi reseita refere fahe ba totál reseita ba rejistrasaun kliente hamutuk rihun $18.708, enkuantu reseita tarifaria ne’ebé rekolla kada fulan hamutuk rihun $5.702.

Maske iha balun seidauk rejistu maibé kliente barak hahú utiliza ona bee-moos iha tempu okupasaun indonézia nune’e bainhira BTL eziste nu’udar empreza públika kliente sira hotu tenke kumpre hikas devér nu’udar utilizadór bee-moos iha Baucau.

BTL,ep aplika sistema non meter ba kliente sira atu selu taxa tanba seidauk monta kontadór ho razaun bainhira distribusaun bee-moos ba utiliza sistema pompa ne’ebé presiza kustu hodi halo manutensaun inklui sosa kombustível.

BTL,ep aplika sistema tolu ba kliente sira atu selu taxa kompostu kliente ne’ebé hetan bee-moos oras rua kada semana fulan-ida selu $3, kliente sira-ne’ebé utiliza bee-mos loron-tolu kada semana selu selu $5 no emprezáriu sira sei kumpre devér kada fulan $6.

“Ita koordena ho autoridade lokál hotu iha munisípiu Baucau nu’udar na’in ba komunidade inklui parte hotu hanesan veteranu nune’e aplika selu taxa,” Adriana da Rosa akresenta.

BTL,ep Baucau rasik rejista tótal kliente hamutuk uma-kain 5.709, hosi númere refere kliente ne’ebe kumpri ona devér hamutuk 209, komposta hosi edifísiu públiku hamutuk 49, repartisaun 22 no sosiál instituisaun hamutuk 27.

Jornalista          : Natalino Belo

Editór                : Evaristo Soares Martins

iklan
iklan

Leave a Reply

iklan
error: Content is protected !!