DILI, 07 novembru 2022 (TATOLI)—Komandu Polísia Nasionál Timor-Leste (PNTL) Munisípiu Dili liuhosi Eskuadra Dom-Aleixo, halo detensaun ba suspeitu JPP ne’ebé deskonfia sona mate Aires Celestino Adelaide iha área Lurumata.
Komandante Polísia Nasionál Timor-Leste (PNTL), Munisípiu Dili, Superintendente Xefe Henrique da Costa, informa kazu sona mate vítima Aires Celestino Adelaide ne’e akontese iha Domingu (06/11), tuku 20:30, kalan, iha área Lurumata, Suku Fatuhada, Postu Administrativu Dom-Aleixo, Munisípiu Díli.
“Daudaun ne’e parte investigasaun Eskudra Dom-Aleixo detein ona suspeitu JPP no hamutuk ho evidensia. Daudaun ne’e Investigadór kontinua investiga hodi hatene motivu hosi JPP ne’ebé hakotu matebian ACC nia vida,” Superintendente Xefe Henrique da Costa hateten liuhosi konferénsia imprensa iha kna’ar fatin Komandu Caicoli, Segunda ne’e.
Tuir nian, investigadór mós rekolla ona informasaun inisiál katak molok kazu ne’e akontese suspeitu ho vitima halimar hamutuk iha uma tanba hanesan kolega, maibé derepente suspeitu foti tudik hosi sona vitima no lori ba ospitál, maibé la konsege salva nia vida.
“Hafoin akontesimentu parte Polísia Eskudra Dom-Aleixo halo kedan intervensaun hodi evakua vitima ba iha Hospital Nasionál Guido Valadares (HNGV), maibé la konsege salva vitima nia vida”, relata Komandante PNTL munisípiu Dili atak nia.
Daudaun ne’e, Investigadór sira mós kontinua rekolla informasaun kona-ba suspeitu nia identidade hodi bele prosesa kazu ne’e ba oin liuliu atu hatene motivu ba kazu ne’e.
“Aviza ba públiku liuliu inan -aman atu evita ka kontrola oan sira labele halimar sasan kro’at iha uma, tanba kuandu mosu buat ruma ne’ebé ita la espera bele fó impaktu ba vida”, nia afirma.
Jornalita: Natalino Costa
Editór : Florencio Miranda Ximenes
