Top

PR Horta-PR Macelo lansa livru misaun exérsitu portugés iha TL

Prezidente Repúblika (PR), José Ramos Horta no Prezidente Repúblika Portugál, Marcelo Rebelo de Sousa, lansa livru intituladu “TIMOR Testamunhos de Quatro Anos de Presença de Forças Nacionais Destacadas Lusas Em Terras do Sol Nascente, 2000-2004”iha Lisboa-Portugál. Imajen/Mídia PR.

DILI, 07 novembru 2022 (TATOLI)—Prezidente Repúblika (PR), José Ramos Horta no nia omólogu Prezidente Repúblika Portugál, Marcelo Rebelo de Sousa, foin lalais, iha Lisboa-Portugál lansa livru intituladu “TIMOR Testamunhos de Quatro Anos de Presença de Forças Nacionais Destacadas Lusas Em Terras do Sol Nascente, 2000-2004”.

Livru ne’e hakerek hosi eskritór kuiñesidu ne’ebé aprezenta direta hosi Embaixadór Fernando de Oliveira Neves, koordena ho parte autoridade militár  hanesan, Tenente Jenerál, Xavier de Sousa, Koronel Miguel Pimenta no Tenente Koronel Luís Pimenta.

Livru “TIMOR Testamunhos de Quatro Anos de Presença de Forças Nacionais Destacadas Lusas Em Terras do Sol Nascente, 2000-2004”. Imajen/Mídia PR.

Livru ho pajina 700 liu ne’e hakerek kona-ba envolvimentu direta hosi exérsitu militár portugés iha misaun manutensaun pas Orgnizasaun Nasaun Unida (ONU) iha Timor-Leste no mós apoiu militár portugés ba formasaun rekursu umanu no modernizasaun instituisaun FALINTIL -FDTL.

Horta, konsidera livru ne’e importante hodi hametin identidade kooperasaun forsa defeza portugés no Timor-Leste nian.

“Livru ida ne’e importante tebes fó kontribuisaun ba istória Timor-Leste ba misaun ONU iha Timor-Leste.” PR Horta hateten liu hosi komunikadu imprensa ne’ebé Agénsia Tatoli asesu, segunda ne’e,

Xefe Estadu destaka apoiu exérsitu hosi Portugál, Austrália, Nova Zelandia, Japaun, Koreia do Sul, Estadus Unidos Amérika, Itália no nasaun seluk tan envolve iha misaun ONU, hodi ajuda dezenvolvimentu PNTL no F-FDTL iha períodu krítiku nia laran, hafoin violénsia hosi tinan 1999 no inísiu independénsia iha tinan 2022.

PR agradese ba prezensa forsa armada Portugál liuhosi dezisaun Primeiru-Ministru, António Guterres no Prezidente, Jorge Sampaio, hodi apoia misaun ba pás, hodi tulun povu Timor-Leste iha situasaun defisíl durante príodu 1999 to’o 2004 hamutuk ho forsa nasaun seluk ne’ebé hola parte iha misaun ONU no mós ho INTERFET.

Prezidente Portugál, Marcelo Rebelo elojia perkursu luta ba libertasaun nasionál no mós dezempeñu ninia ómologu Ramos Horta iha kontestu diplomátiku.

“Buat ne’ebé halo la’ós de’it ba Portugál maibé mós ba komunidade internasionál, ba povu Timor hodi fó omenajen, korajen hosi povu Timor, hosi jerasaun ba jerasaun ne’ebé luta ba ninia afirmasaun independénsia iha mundu, luta kontra kontestu externu, kontra kontestu jeoestratéjiku no saida mak liu. Hanesan ezemplu ida iha istória kontemporánea, tanba luta ba libertasaun nasionál alkansa duni, no tuir mai estabilizasaun polítika no institusionalizasuan demokratika, iha difikuldade nia laran. Maibé ne’e mos to’o susesu, dala ida tan ho Prezidente Ramos Horta ninia Xefia to’o susesu,” Xefe Estadu Portugál haktuir liu hosi nota.

Entertantu, lansamentu livru ne’ebé hala’o iha akademia militár iha Amadora Distritu Lisboa ne’e, hetan partisipasaun másimu hosi lideransa militár portugés, korpu diplomatiku, eskritór importante sira no membru Governu.

Jornalista : Nelson de Sousa

Editór      : Cancio Ximenes

 

Publisidade

Leave a Reply

Latest Post

error: Content is protected !!