DILI, 07 novembru 2022 (TATOLI)—Diretór Servisu Saúde Munisípiu (SSM) Manatuto, Mateus Vicente Correia, informa, daudaun ne’e prepara ona ekipa no ekipamentu liuliu fumigasaun no abate atu prevene moras dengue.
“Hosi fulan outubru to’o agora ami siedauk rejista kazu dengue, maske udan monu rai ona bebeik, Ami prepara hela fumigasaun bainhira komunidade sira afeta kazu dengue, ami nia ekipa tuun kedas ba halo fomigasaun”, informa Diretór SSM Manatuto ne’e ba TATOLI via telefónika, segunda ne’e.
Ekipa saúde munisípiu Mantuto nafatin halo sosializasaun ba populasaun sira atu hamoos valeta, bairru, uma ninin, bee nalihun sira atu prevene moras dengue.
“Ami nia kímiku abate no fumigasaun sufisiente tanba fulan kotuk ami nia ekipa ba foti iha nasionál lori mai ona no ekipa sira preparadu ona atu tuun ba tereñu bainhira kazu dengue iha liuliu ba área risku sira”, katak
Nia dehan antes udan monu rai iha fulan-agostu mak deteta kazu dengue tolu iha sentru saúde Laleia, hafoin halo tratamentu ekipa sira tuun ba halo fomigasaun no halo kedas intervensaun iha komunidade nia leet.
“Ita nia ekipamentu médiku daudaun ne’e sufisiente hodi halo tratamentu ba pasiente sira iha Manatuto rasik”, nia afirma.
Jornalista : Felicidade Ximenes
Editór : Florencio Miranda Ximenes
