ME preokupa ho funsionáriu iha Vikeke tenta impede ezame nasionál
DILI, 17 Outubru 2025 (TATOLI)—Sekretáriu Estadu Ensinu Sekundáriu Jerál no Eninsu Tékniku Vokasionál, Domingos Lopes Lemos preokupa ho funsionáriu Ministériu Edukasaun (ME) nian iha Munisípiu Vikeke ne’ebé tenta atu halo impedimentu ba ezame nasionál.
“Profesór ka funsionáriu Ministériu Edukasaun iha Vikeke hakarak halo boikoita ba Eskola Sekundáriu Jerál Filiál ida Iraler. Ha’u haruka Autoridade Vikeke atu kontaktu autoridade seguransa hodi fó seguransa ba ezame nasionál durante loron tolu,” Sekretáriu Estadu dehan iha Sentru Nasionál Impresaun Komoro, Dili, Sesta ne’e.
Govenante realsa katak labele fó responsabilidade ba profesór ida hanesan ne’e atu sai obstákulu hodi impede prosesu ezame nasionál.
Notísia relevante: ME distribui ona pontu ezame nasionál ba eskola iha territóriu
Iha fatin hanesan, Diretór Servisu Edukasaun Munisípiu Vikeke, Júlio Sakadura dehan laiha impedimentu tanba parte edukasaun Vikeke fó hatene ona ba administradór postu liuliu Xefe Suku Matahoi.
“Sira iha lamentasaun ne’e loos, maibé atu halo impedimentu ne’e lae, tanba orientasaun husi Ministériu Edukasaun liuhusi Edukasaun Munisípiu Vikeke foti ona karta ba iha-ne’ebá, halo tiha ona nomeasaun ba koordenadór ezame nasionál, ne’ebé ezame nasionál sei la’o,” Sakadura haktuir.
Nia hatutan Ensinu Sekundáriu Jerál Filiál uluk iha VIII Governu ne’e sai sentrál maibé tanba sira la prenxe kritériu entaun Governu atuál deside sai eskola sekundáriu filiál.
“Sira-nia ezijénsia ne’e hakarak sai sentrál maibé la prenxe kritériu tuir lei ne’ebé Ministériu Edukasaun estabelese tanba ita hotu-hotu mai respeita lei. Lei mak importante. Lei mak regula iha hotu. Ami esplika buat barak ona iha-ne’ebá. Sira hotu-hotu rona nune’e ita bele realiza ezame nasionál,” Sakadura subliña.
Jornalista: Osória Marques
Editór: Xisto Freitas da Piedade
