DILI, 17 Outubru 2025 (TATOLI)—Ministériu Edukasaun (ME) hamutuk ho Sentru Impresaun Nasionál Komoro, Sesta ne’e, distribui ona pontu ezame nasionál ba eskola iha territóriu hodi realiza ezame nasionál iha 20 Outubru tinan ne’e.
“Ohin, 17 Outubru 2025, Ministériu Edukasaun hamutuk ho dirijente nasionál no munisipál, halo serimónia distribuisaun pontu ezame nasionál ne’ebé segunda semana oin sei hala’o ezame nasionál. Ida-ne’e pontu importante ida ba sira-nia vida akadémika,” Ministra Edukasaun, Dulce de Jesus Soares hateten ba jornalista sira iha Sentru Nasionál Impresaun Komoro, Dili.
Governante ne’e apela ba dirijente hotu-hotu tantu nasionál no munisipál atu akompañia, kolabora hodi realizasaun ezame nasionál ho di’ak no susesu.
Totál estudante finalista ne’ebé atu tuir ezame nasionál hamutuk 56.040 kompostu hosi ensinu báziku 26.743, ensinu sekundáriu jerál hamutuk 25.012, ensinu sekundáriu tékniku vokasionál iha 3.717, programa nasionál ekivalénsia ensinu báziku 411 inklui estudante ne’ebé husu autoprostu iha ema 157.
Iha fartin hanesan, Koordenadór Gabinete Kurríkulu Unidade Nasionál, João Maupelu esplika sentru ne’ebé uza ba ezame nasionál ensinu báziku nian hamutuk 352, sentru ba ensinu sekundária jerál 150, ensinu sekundáriu tékniku vokasionál iha 23 no sentru ba programa nasionál ekivalénsia ensinu báziku 19.
Nia dehan, iha Segunda 20 Outubru, ba ensinu báziku hahú ho dixiplina matemátika ho ingléz, Tersa língua portugeza ho istória no jeografia, Kuarta ne’e dixiplina siénsia fízika naturál no tétun, ezame lokál iha Sesta ho dixiplina relijiaun.
Ensinu sekundáriu jerál iha Segunda ne’e hahú ho matemátika, ekonomia ho métodu kuantitativu, Tersa língua portugeza ho kímika, Kuarta biolojia ho sosiolojia, Kinta tétun.
Jornalista: Osória Marques
Editór: Xisto Freitas da Piedade
