DILI, 07 novembru 2022 (TATOLI) – Governu liuhosi Sekretariu Estadu Juventude no Desportu (SEJD), Abrão Saldanha, konsidera katak iha semana kotuk Timor-Leste derrota kontra Brunei Darusalam iha jogu kualifikasaun Mitsubishi Asian Football Federation (AFF) ho eskore 2-6 tanba jogadór prinsipál balun la tuun.
“Loos duni ita haree jogu foin lalais ita lakon ne’e tanba jogadór prinsipál sira hanesan Paulo Gally, Filomeno Juniór ne’ebé antes ne’e kapitaun no seluk tan balun la tuun mak kontribui hotu. Maibé laiha buat ida, futeból ne’e jogu ekipa ne’ebé falla ne’e falla hotu. Ezemplu hanesan nasaun Italia nia kampiaun Euro, maibé nia la tama kopa mundial, ne’ebé normál ba ita”, dehan SEJD Abrão iha Dili, segunda ne’e.
Tuir nian iha desportu ne’e la haree ba orsamentu de’it, maibé haree ba unidade ekipa ne’ebé metin mak bele manán, nune’e mós futeból depende ba sorte no estratéjia di’ak bele gaña no estratéjia la di’ak sei derrota.
SEJD hetan ona informasaun katak jogadór balun to’o agora seidauk hetan remunerasaun hosi Federasaun Futeból Timor – Leste (FFTL) mak la konsege partisipa iha jogu ne’e.
“Kona-ba remunerasaun jogadór sira nian ha’u hetan duni informasaun no FFTL halo ona esplikasaun mai ha’u tanba transferénsia balun tarde ba sira ho nune’e agora sira buka dalan hamutuk ho Asian Football Confederation (AFC) hodi resolve”, nia dehan.
FFTL mós relata ona katak treinadór Brazilleiru Fabio Maciel nia kontratu ramata ona no agora dadaun ekipa selesaun nasionál seniór treinadór hosi Malazia Gopalkrishnan A.S. Ramasamy.
Alende ne’e, públiku barak kestiona tanba Liga Futeból Timor – Leste la lao to’o agora mak impaktu ba derrota ne’ebé ekipa Lafaek ne’e hetan liu hosi sofre golu neen, tanba antes ne’e Timor-Leste sempre manán Brunei.
Hosi lakon ne’e hatudu no nakfilak ona istória futeból entre nasaun rua. Iha ne’ebé hahú 2002 to’o agora foin dala ida Brunei manán Timor – Leste.
“Liga ne’e Governu iha ona osan, maibé hein de’it LFTL no FFTL seidauk haruka proposta mai to’o agora mak seidauk lao ne’e, maibé sira dehan atu haruka ona mai, fiar katak liga sei lao iha tempu besik,” nia informa.
FFTL haruka lista naran Jogadór tarde ba AFF
Entretantu, Jogadór Filomeno Junior ne’ebé antes ne’e hanesan kapitaun ba ekipa selesaun nasionál U-23 no seniór sente triste tanba marka hotu prezensa iha Brunei, maibé la konsege joga tanba FFTL manda sira nia naran ba AFF tarde.
“Antes ne’e FFTL la bolu ona ami ba hamutuk ho selesaun, maibé depois semana ida arranka sira foin bolu fali ha’u ho kolega Cristovão ne’ebé antes ne’e treinadór hapara ba iha FFTL hodi hatama passaporte, ne’e mak ami mai hotu iha ne’e, maibé FFTL manda ami nia naran tarde entaun ami labele joga tanba ami nia naran iha lista laiha, sira foin manda sesta semana kotuk sábadu joga ema la hatan, maibé ema fó tempu ne’e naruk sira la hatama,” dehan Filomeno.
Ho nune’e TATOLI tenta konfirma ho FFTL, maibé deidauk fó komentáriu tanba okupadu ho servisu esensiál balun.
Jornalista: Hortencio Sanchez
Editór : Florencio Miranda Ximenes
