AMD koloka ona seguransa na’in-neen iha Jardin 05 de Maio

DILI, 08 novembru 2022 (TATOLI)—Governu liuhosi Autoridade Munisípiu Dili iha fulan-outubru tinan ne’e, koloka ona seguransa na’in-neen hodi tau matan ba Jardin 05 de Maio iha Colmera, Dili.
“Ami na’in-neen ne’ebé servisu hanesan seguransa iha jardin ne’e, ami asina ona kontratu iha loron 03 fulan-outubru tinan 2022. Hosi ne’e, ami hahú servisu ona hanesan seguransa oinsá tau matan ba Jardin 05 de Maio ne’e,” Pesoál Seguransa, Felis Sarmento, hateten ba Agência TATOLI, iha nia kna’ar fatin Jardin 05 de Maio, Colmera, Dili, tersa ne’e.
Servisu ne’ebé sira na’in-neen hala’o hanesan seguransa iha Jardin 05 de Maio ne’e mak tau matan ba ambiente jardin nian, atu ema-ne’ebé ba pasa tempu liu-liu estudante sira ba tuur halo servisu ruma ne’e labele so’e foer arbiru iha jardin laran.
“Aleinde ne’e, ami haree mós vendedór sira labele so’e foer arbiru no mós kontrola karreta no motor tenke para tuir nia fatin ka para iha parajen, hodi labele para fali iha jardin laran,” nia dehan.
Maske nune’e, área ne’ebé sira tau matan hodi fó seguransa mak hahú hosi jardin iha Hotel Timor nia oin, depois mai Jardin 05 de Maio, tesik fali ba jardin iha Igreja Motael nia oin to’o Komisaun Antí Korrupsaun (CAC, sigla portugés).
“Iha servisu ne’e, ami na’in-neen (6) foti desizaun ami fahe oráriu, hanesan loron rua ba seguransa na’in-tolu no loron rua (2) seluk ba seguransa na’in-tolu seluk,” nia dehan.
Durante servisu hanesan seguransa iha Jardin 05 de Maio, sira-nia parte hasoru difikuldade, hanesan lixu fatin iha Jardin 05 de Maio nian ne’e aat hotu ona, tanba bainhira ema atu tau lixu ba laran, foer sira sai fali hosi lixu fatin nia okos, entaun prejudika sira-nia servisu bainhira sira hasee no husu ema atu tau foer iha lixu fatin.
“Lixu fatin Bidon sira-ne’e kuak barak. Ita tau lixu hosi leten sai fali hosi okos. Ho ida-ne’e ami hasee ema, dala ruma sira dehan ita-boot sira hasee katak tau lixu iha nia fatin maibé lixu ne’e ami atu ba tau iha ne’ebé, se lixu-fatin kuak hotu hanesan ne’e,” nia esplika.
Aleinde ne’e, seguransa ba Jardin 05 de Maio iha tempu kalan laiha, tanba seguransa nia servisu mak iha tempu loron, hahú hosi tuku 07h00 dadeersan to’o tuku 17h30 lorokraik.
“Tanba ne’e, ami sujere ba Governu liu-liu Autoridade Munisípiu Dili atu tau seguransa permanente ba Jardin 05 de Maio, atu nune’e ho totalidade tau matan ba ambiente jardin ninian. Tanba, hanesan seguransa Munisípiu Dili, fiar ami no monta ona ami iha ne’e maibé ami husu ba Governu tenke monta seguransa ne’e permanente, atu haree karik ema ruma mai han ka toba iha ne’e seguransa bele haree sira. Se seguransa mai hanesan provizóriu de’it, ohin ami hasee aban sira halo fila-fali, ida-ne’e mak ami triste boot,” nia hateten.
Entretantu, pesoál seguransa na’in-neen ne’ebé halo servisu hanesan seguransa iha Jardin 05 de maiu, hahú asina ona kontratu iha 03 fulan-outubru tinan 2022 no sei ramata iha fulan-janeiru tinan oin. Enkuantu, servisu ne’ebé sira hala’o hahú hosi loron segunda to’o domingu hosi tuku 07h00 to’o 17h30 lorokraik no kada fulan simu saláriu $115.
Jornalista : Nelia Fernandes
Editór : Cancio Ximenes

