DILI, 08 novembru 2022 (TATOLI)—Autoridade Munisípiu Dili (AMD), liuhosi Dirasaun Jestaun no Merkadu ne’ebé koopera ho Polisia Nasionál Timor-Leste (PNTL) Unidade Tránzitu, iha fulan-outubru tinan ne’e prende ona karreta rua (2) ne’ebé faan iha trotoar leten iha área Kaza Europeia nia oin.
“Momentu, iha Kaza Europeia ita prende karreta rua (2) no iha fatin seluk laiha, tanba ita ba sira konsege muda no sira kolabora tebes, ita hateten, sira muda. Maibé, iha Kaza Europeia oin momentu ita prende karreta, nia na’in iha maibé nia finje la rona no nia sees tiha. Hosi ne’e Polísia ba mak nia foin mosu mai depois lori xave ba entrega. Entaun, ho ida-ne’e nia tenke tuir prosesu mak multa ba selu iha banku,” Xefe Departamentu Jestaun no Merkadu iha Autoridade Munisípiu Dili (AMD), Gaspar da Silva, informa ba Agência TATOLI iha nia kna’ar fatin, Caicoli, Dili, tersa ne’e.
Tuir lei, lisensiamentu ba halo negósiu, negosiante sira-ne’ebé faan karreta tenke iha fatin própriu labele sira iha lisensiamentu kona-ba negósiu nian maibé sira laiha fatin própriu, ida-ne’e sira kontra.
“Tanba ne’e, ita-nia parte Dirasaun Jestaun no Merkadu atu kontrola no haree ba ida-ne’e. Ne’ebé, ba maluk emprezáriu sira, kuandu halo negósiu sira tenke iha fatin própriu rasik tanba ami labele prepara no buka fatin fó fali ba maluk sira,” nia dehan.
Kona-ba negosiante sira-ne’ebé kontinua faan karreta iha Kaza Europeia oin, maibé la uza surat-tahan “For Sale”, nia dehan, sira-nia parte sei kontinua servisu hamutuk ho polísia tranzitu hodi kontinua kontrolu ba atividade sira iha dalan ibun, liu-liu atividade negosiante sira uza trotoar hodi halo negósiu faan karreta no motor.
“Ita sei koordena nafatin ho Polísia sira atu kontinua la’o, tanba ita hatene Dili ne’e luan, ida-ne’e ami-nia serbisu,” nia hateten.
Entretantu Xefe Departamentu Jestaun no Merkadu iha Autoridade Munisípiu Dili (AMD), Gaspar da Silva, informa prosesu selu multa ne’ebé sira-nia parte ho Polísia tranzitu prende ne’e, parte polísia tranzitu mak hatene, selu hira iha banku.
Enkuantu, tuir observasaun jornalista Agência Tatoli iha terrenu nota katak iha área Kaza Europeia oin, negosiante sira kontinua faan maibé sira la uza surat tahan “For sale” maibé iha Jardin Largo de Lecidere daudaun ne’e laiha ona.
Jornalista : Nelia Fernandes
Editór : Cancio Ximenes
