COVALIMA, 08 novembru 2022 (TATOLI)–Prezidente Komisaun Organizadór, Francisco de Jesus Alves, informa komunidade Covalima sei komemora loron proklamasaun independénsia 28 novembru ba dala-47 ho atividade desportu komunitáriu.
“Ita halo prepraparsaun ona ba komemorasaun loron proklamasaun independénsia Timor-Leste ba dala- 47 mak sei hala’o isar Bandeira, ita mós presija partisipa komunidade, autoridade lokál no líder komunitáriu. Ita sei loke feira ne’e, ita konvida grupu tein-sira sei mai aprezenta produtu lokál no ita mós iha desportu tradisionál mak kompetisaun halai taru kuda no kalan kulturál,” ,Francisco de Jesus Alves informa ba Agência tatoli, iha nia kna’ar fatin AMC, Sukaer Laran, tersa ne’e.
Tanba ne’e, atu komemora loron nasionál 28 novembru, Covalima halo preparasaun hala’o enkontru hodi halo ajustamentu ba estrutura komisaun organizadora no elabora planu orsamentu.
Atu komemora loron nasionál 28 novembru, Covalima sei realiza atividade loke feira ne’ebé organiza liuhosi servisu munisipál seguransa alimentar no servisu munisipál jestaun merkadu no turizmu hamutuk ho seksaun komisaun organizadora sira.
Komisaun organizadora 28 novembru, organiza ativitividade sira hanesan feira, kompetisaun tein hahán lokál, kalan kulturál no kuda halai taru, sei distribui prémiu ba sira maibé komisaun sei hato’o pedidu ba administradór munisípiu Covalima atu aprova orsamentu
“Atividade kompetisaun tein hahan lokál sei iha prémiu. Ita sei identifika lai atividade kuda halai taru sei kontinua, maibé komisaun sei hato’o pedidu ba administradór munisipiu Covalima aprova orsamentu, ita foin bele realiza programa hirak ne’e,” nia dehan.
Ho nune’e, provizóriu prevee orsamentu $7000-resin maibé kontinua sei halo ajustamentu atividade sira seluk maibé sei halo enkontru finál mak sei aprezenta.
Jornalista : Celestina Teles
Editór : Cancio Ximenes
