Diresaun Floresta Baucau halo apreensaun ai hamutuk kúbiku 30-resin
BAUCAU, 08 novembru 2022 (TATOLI) – Diresaun Territórial Florestrál no Plantasaun Industriál munisípiu Baucau iha tinan 2022 halo apreensaun ba ai hamutuk kúbiku 30-resin ne’ebé komunidade sira tesi no transporta ilegalmente.
Koordenadór no Xefe Departamentu Reprezentasaun Territórial Florestrál no Plantasaun Industriál munisípiu Baucau, Pasqual Afonso Belo, esplika, hosi númeru refere maioria kategoria ai-sunu, bantala kuadradru hamutuk kúbiku tolu no ai-teka kuadradu kúbiku ida-ne’ebé komunidade sira tesi no transporta ilegalmente iha territórial Baucau.
“Ami konsege kaptura komunidade sira-ne’ebé laiha lisensa no autorizasaun bainhira tesi no tula ai arbiru,” Koordenadór no Xefe Departamentu Reprezentasaun Territórial Florestrál no Plantasaun Industriál munisípiu Baucau informa ba Tatoli iha Vila Nova, tersa ne’e.
Pasqual Afonso Belo argumenta, hafoin diresaun florestrál aumenta rekursu liuhosi rekrutamentu funsionáriu konsege halo operasaun no deteta komunidade sira-ne’ebé tesi no tula ai ilegál iha área munisípiu Baucau.
Área ne’ebé parte florestrál halo apreensaun hosi munisípiu tolu seluk hanesan Lautem, Viqueque no Manatuto no Baucau hanesan hosi kuaze postu administrativu neen no maioria iha postu Vemasse ho tipu ai-kakeu, sukaer ne’ebé komunidade sira tesi no tula fa’an iha Baucau no transporta ba Dili.
“Ami hakarak hapara atividade ilegál atu nune’e bele halo jestaun ba ai ba sira ne’e,” Pasqual Belo akresenta.
Diresaun Florestrál husu komunidade atu kumpre no trata dokumentu legál hanesan lisensa sosiál ho razaun tesi ai atu konstrui uma no lisensa komersiál ne’ebé antes ne’e komunidade rasik kuda ona liuhosi karta koñesementu hosi autoridade suku no postu administrativu.
Métodu prevensaun ne’ebé parte florestrál territórial Baucau halo liuhosi gurda florestrál serbisu hanesan hamutuk kolaborasaun ho autoridade suku hodi sosializa kona-ba labele sunu no tesi ai inklui oho animál arbiru.
Hosi apreensaun atividade ilegál refere parte florestrál kontinua hamutuk kazu lima ne’ebé iha faze prosesu no presta deklarasaun iha Ministériu Públiku Baucau.
Tótal guarda Florestrál munisípiu Baucau hamutuk na’in-21 ne’ebé destakadu ba kada postu administrativu na’in-rua no seluk halao atendimentu iha edifísiu.
Jornalista : Natalino Belo
Editór : Evaristo Soares Martins
