iklan

EKONOMIA, HEADLINE, MUNISÍPIU, OÉ-CUSSE (RAEOA), POLÍTIKA

Empreza Emjebe Pharma-Autoridade RAEOA diskute futuru investimentu iha setór saúde

Empreza Emjebe Pharma-Autoridade RAEOA diskute futuru investimentu iha setór saúde

Empreza Emjebe Pharma-Autoridade RAEOA diskute futuru investimentu iha setór saúde. Imajen Tatoli/ Abílio Elo Nini.

OÉ-CUSSE, 08 novembru 2022 (TATOLI)-Diretór PT.Emjebe Pharma, Bambang Gustoyo hamutuk ho Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, diskute futuru investimentu iha setór saúde nian kona-bá fornesimentu aimoruk ba fasilidade saúde sira iha rejiaun ne’e.

Sorumutu diskusaun ne’e akompaña direita hosi Servisu Autónomu Medikamentu no Ekipamentu Saúde (SAMES), Sekretáriu Rejionál Saúde, Manuel da Costa hamutuk ho profisionál saúde sira mai hosi Hospitál Referál Oé-Cusse.

Hafoin diskusaun, Prezidente Autoridade RAEOA, Arsénio Paixào Bano, esplika, intensaun hosi diskusaun ne’e atu diskute ba futuru investimentu iha setór saúde, liuliu atu investe iha ai-moruk ba fasilidade saúde sira iha Oé-Cusse.

“Ohin, ita diskute ba futuru atu investe iha setór saúde, autoridade mós identifika ona empreza ida-ne’e, atu fornese infus barak mai Timor ho aimoruk balu, iha posibilidade ita bele halo investimentu ho empreza ne’e, ho intensaun katak ba futuru Timor-Leste ita mós iha fábrika ai-moruk rasik,” Arsénio Paixào Bano, informa ba jornalista sira hafoin enkontru iha Gabinete ZEESM, Oé-Cusse.

Arsénio Bano afirma, atu atinje kooperasaun ne’e, presiza hahú uluk ho estudu, iha posibilidade atubele mós sosa sósiu iha empreza ne’e, iha posibilidade katak aimoruk sira mai Timor, liuliu mai Oé-Cusse, bele iha ona padraun no uza de’it iha Oé-Cusse kona-bá infus no ai-moruk seluk tánn.

“Maibé ohin ne’e hanesan enkontru dahuluk, ha’u sei husu tékniku sira atu estuda di’akliu tán, no sei haruka delegasaun ida ba haree mós empreza nia fasilidade sira, maibé ita iha koñesimentu di’ak ona tanba daudaun ne’e empreza serbisu hamutuk ho SAMES Timor-Leste nian,” nia afirma.

Diretór PT., Bambang Gustoyo, agradese ba Autoridade RAEOA tanba iha inisiativa hakarak serbisu hamutuk ho empreza PT.Emjebe Pharma iha setór saúde.

“Ami hosi empreza Indonézia agradese tebes, tanba Autoridade RAEOA hakarak serbisu hamutuk atu harii investimentu iha Oé-Cusse, ami reprezenta Governu Indonézia orgullu tanba liuhosi kooperasaun ne’e ita bele fasilita ba malu kona-bá fasilidade saúde nian,” nia orgullu.

Responsável másimu empreza PT. PT.Emjebe Pharma ne’e fundamenta, kona-bá kooperasaun ne’e, foin mak iha faze diskusaun maibé garante katak, iha futuru parte rua sei tuur hamutuk atu haree nia posibilidade, tanba Autoridade RAEOA mós hakarak investe iha sósiu hodi serbisu hamutuk ho empreza, nune’e ai-moruk bele fornese direita ba fasilidade saúde sira iha Oé-Cusse.

Jornalista: Abílio Elo Nini
Editór: Evaristo Soares Martins

iklan
iklan

Leave a Reply

iklan
error: Content is protected !!