iklan

COVALIMA, SEGURANSA

EUA fó apoiu ekipamentu patrulla unidade 160 ba PNTL Covalima

EUA fó apoiu ekipamentu patrulla unidade 160 ba PNTL Covalima

Embaixadór Estadu Unidu Amerika (EUA) iha Timor-Leste, Tom Daley, entrega ekipamentu patrulla ba komandu PNTL Munisípiu Covalima. Imajen Tatoli/Celestina Teles.

COVALIMA, 08 novembru 2022 (TATOLI)–Embaixadór Estadu Unidu Amérika (EUA) iha Timor-Leste, Tom Daley, fó apoiu ekipamentu patrulla unidade 160 ba komandu Polísia Nasionál Timor-Leste (PNTL) Munisípiu Covalima hodi apoiu ba halo seguransa iha fronteira.

“Ohin, ha’u mai entrega ekipamentu patrulla160 ne’e inklui ekipamentu seguransa, primeiru sukoru, no matadalan ba kampu ida hodi deteta no hatan ba poténsia vítima tráfiku umanu,” Embaixadór EUA, Tom Daley, hateten liuhosi diskursu iha komandu PNTL Munisípiu Covalima, tersa ne’e.

EUA fó  apoiu ekipamentu ne’e atu tulun hodi haforsa aplikasaun lei iha munisípiu Covalima, nu’udar munisípiu ida iha Timor-Leste ne’ebé lokaliza iha fronteira. Ekipamentu ne’e mós tulun lori mai Timor-Leste nia esforsu hodi kombate tráfiku umanu no ba oin liuhosi hasa’e investigasaun, detensaun, konviksaun no identifikasaun ba vítima.

Tanba ne’e, EUA kontinua haforsa PNTL ninia prátika ba aplikasaun lei ne’ebé efetivu hodi proteje timoroan hotu.

“Estadu Unidu Amérika loke ba kualker oportunidade hodi kontinua haforsa PNTL ninia prátika ba aplikasaun lei ne’ebé efetivu hodi proteje timoroan, komunidade lokál no ema hosi nasionalidade no orijen hotu-hotu nia dignidade no direitu umanu iha Timor-Leste. EUA prontu hamriik nu’udar parseiru hodi servisu hamutuk atu asegura vítima no individuál vulneravél sira hodi simu asisténsia ne’ebé sira presiza,” nia hateten.

Tinan ne’e, marka aniversáriu ba dala-20 tantu Timor-Leste nia independénsia no mós ba relasaun diplomátiku entre Timor-Leste ho Estadu Unidu Am’erika (EUA) ho di’ak liután.

“Tinan ne’e marka aniversáriu ba dala-20 tantu ba Timor-Leste nia independénsia no mós ba relasaun diplomátiku entre ita-nia nasaun rua, ita kontinua esforsu no haforsa ita-nia relasaun ne’ebé boot ba daudaun,” nia dehan.

Komandante PNTL Munisípiu Covalima, Superintendente Basilio de Jesus, hato’o agradesimentu ba EUA fó apoiu hodi oferese ekipamentu pesoál ba PNTL Munisípiu Covalima.

“Ita hotu hanesan timoroan, apoiu hotu-hotu mai hosi parseiru sira ita hanesan timoroan hato’o  agradese, tanba Embaixadór EUA iha Timor-Leste fó apoiu ekipamentu pesoál, muxila ne’ebé  iha tempu operasaun ita-bele uza kuaze 160 ba polísia hodi hala’o servisu iha operasaun nian,”  Komandante PNTL Covalima reforsa.

Ho nune’e, EUA nia apoiu ba pesoál hotu-hotu nia servisu liu-liu ba tempu iha operasaun, tinan oin mai Timor-Leste sei selebra festa demokrásia eleisaun parlamentár, tan ne’e ho ekipamentu sira-ne’e pesoál polísia sira sei bele uza ekipamentu hirak ne’e hodi hala’o servisu di’ak liután.

Komandante PNTL Munisípiu Covalima haktuir, iha tinan hirak liu ba EUA fó apoiu rádiu ne’ebé kontinua sei uza no fó apoiu had set ba PNTL Covalima.

“Hau informa ba embaixadór kona-ba situasaun sistema konunikasaun afeta tebes ba iha servisu, maibé embaixadór la promete sei buka meiu oinsá atu bele kompleta rádiu ne’ebé iha tinan hirak liu ba fó ona ba ita, ne’ebé oras ne’e ita-nia Ofisiál Polisia Suku (OPS) sei uza,” nia hateten.

Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!