DILI, 08 novembru 2022 (TATOLI)–Ró-ahi Berlin Nakroma to’o hikas mai Dili, tersa ne’e, hafoin ramata halo manutensaun iha Surabaya, Indónezia, iha abril 2022.
“Deputadu sira kestiona katak to’o agora ró-ahi Berlin Nakroma la mai. ha’u hakarak kuriji katak la’ós la mai maibé seidauk mai de’it. Maibé ha’u atu dehan tersa ne’e ró Berlin Nakroma atraka ona iha Portu Dili tanba manutensaun hotu ona,” Ministru Transporte no Komunikasaun (MTK), José Agustinho da Silva, hateten, iha Parlamentu Nasionál (PN), tersa ne’e.
Notísia relavante: Ró Berlin Nakroma arranka ona ba Indonézia halo manutensaun
Ba kestaun ne’e, Ministru simu ona informasaun hosi ekipa téknika Autoridade Portuáriu Timor-Leste (APORTIL) ne’ebé koordena hela atu husik mamuk fatin hodi nune’e ró Nakroma bele atraka.
“Bainhira to’o mai bele halo ona operasaun, ne’ebé kona-ba konetividade marítima ha’u hanoin ita laiha ona problema, tanba ita iha ró-ahi Berlin Ramelau, enkuantu Berlin Nakroma mai tan ona. Ita iha ró-ahi tolu,” nia akresenta.
Kustu manutensaun ró-ahi Berlin Nakroma hamutuk $393.000 resin ne’ebé mai hosi Orsamentu Jerál Estadu (OJE) 2022.
Ró-ahi Berlin Nakroma halo operasaun ho rute Dili bá Oé-cusse no Dili bá Ataúro.
Jornalista : Antónia Gusmão
Editora : Julia Chatarina
