iklan

NASIONÁL, POLÍTIKA

Aban, MAPKOMS aprezenta indeks públiku asesu ba meiu komunikasaun

Aban, MAPKOMS aprezenta indeks públiku asesu ba meiu komunikasaun

Imajen/Espesiál.

DILI, 09 novembru 2022 (TATOLI)–Ministériu ba Asuntu Parlamentár no Komunikasaun Sosiál (MAPKOMS), liuhosi Dirasaun Nasionál Diseminasaun ba Informasaun (DNDI), Departamentu Peskiza Análiza no Média (DPAM), kinta (10 novembru 2022) aban, sei realiza semináriu nasionál, iha salaun Delta Nova, Dili, hodi aprezenta rezultadu peskiza ka indeks públiku nia asesu ba meiu komunikasaun sosiál iha Timor-Leste.

Peskiza ida-ne’e, MAPKOMS hala’o bazea ba planu ne’ebé haktuir iha planu asaun anuál tinan 2021 no 2022 DNDI nian, iha programa Garantir à Liberdade de Expressão e Acesso à Informação ho nia Sub-programa disseminação de informação sobre ação governativa e do programa de desenvolvimento iha atividade Pesquisa Index Público Acesso aos Meios de Comunicação Social.

“Objetivu hosi peskiza ida-ne’e mak buka hatene públiku nia utilizasaun ba meiu komunikasaun sira no públiku nia asesu ba informasaun kona-ba programa Governu da-ualu nian,” refere komunikadu imprensa ne’ebé MAPKOMS dirije ba Agencia Tatoli, kuarta ne’e.

Peskiza ida-ne’e mós, atu kria baze dadus nasionál ba opiniaun públiku nia asesu informasaun iha meius komunikasaun, hodi propoin polítika ne’ebé adekuadu no inovativu ba nesesidade MAPKOMS.

Nune’e mós, alvu ba peskiza ne’e mak populasaun hotu iha territóriu laran tomak ho idade hahú husi tinan 15 ba leten. Peskiza ne’e hala’o ho tema Sidadaun nia asesu ba meiu komunikasaun sosiál.

Durante peskiza, komunikadu ne’e haktuir, Departamentu Peskiza Análiza no Média (DPAM), hala’o koordenasaun ho Autoridade lokál sira, hanesan Prezidente Autoridade Munisípiu, Administradór Postu, Xefe Suku, Enumerádor no hetan mós apoiu husi Jestór Rádiu komunidade sira, liu-liu Jestór Rádiu Iliwai Manatuto, Jestór Rádiu Povu Vikeke no Jestór Rádiu Komunidade Mauloko-Maubisse.

Peskiza ida-ne’e hahú hala’o iha fulan-maiu tinan 2021 no remata iha fulan-agostu tinan 2022. Prosesu rekolla dadus hala’o ho durasaun tinan ida no hala’o iha munisípiu 14, inklui RAEOA, iha postu 27 no suku 101.

Entretantu, semináriu ne’e hala’o iha Salaun Delta Nova, Komoro-Dili, ne’ebé partisipa hosi ema na’in atus tolu mai hosi Membru Governu, Parlamentu Nasionál (PN), Autoridade Lokál, Organizasaun Naun-Governamentál, Institusaun Mídia, Agénsia Nasionál, Internasionál no reprezenta Estudante Universitáriu sira.

Jornalista : Nelia Fernandes

Editór        : Cancio Ximenes

iklan
iklan

Leave a Reply

iklan
error: Content is protected !!