BAUCAU, 09 novembru 2022 (TATOLI) – Konkorrente na’in-60 hosi munisípiu haat iha rejiaun leste selesionadu iha kompetisaun negósiu inovativu ne’ebé hala’o hosi Ministériu Turismu, Komérsiu no Indústria (MTKI).
Vise Ministru Turizmu, Komérsiu no Indústria, Domingos Lopes Antunes, hateten, prezensa iha Baucau hanesan parte kontinuasaun hosi programa kompetisaun inovativu ne’ebé antes lansa ona iha fulan-agostu iha sentru leste komposta hosi munisípiu haat hanesan Lautém, Manatuto, Viqueque no Baucau.
“Entre na’in-60 sei halo selesaun tán, komisaun juri sei tetu la’ós hotu-hotu pasa, ha’u enkoraza nafatin tanba ne’e parte hosi prosesu maibé ba sira-ne’ebé la selesiona sei iha oportunidade atu prepara di’ak liutan iha programa tuir mai,” Vise-Ministru Turizmu, Komérsiu no Indústria hateten iha Sentru Konvensaun Baucau (CCB, sigla portugés), Vila Antiga, kuarta ne’e.
Hosi munisípiu haat ne’e konkorrente 230 mak rejistradu no na’in-60 mak selesionadu hodi kontinua ba faze finál nune’e sei kontinua ba formasaun durante loron-rua no tuir planu sei anunsia rezultadu manán-na’in iha fulan-novembru ne’e.
Kompetisaun refere atu enkoraja no motiva emprezáriu lokál iha munisípiu haat hanesan Baucau, Lautém, Manatuto no Viqueque, atu iha negósiu inovativu no kria empregu ba komunidade sira hodi haburas ekonomia iha baze.
MTKI prevee orsamentu hamutuk rihun $200 ne’ebé parte kontinuasaun hosi kompetisaun inovativu ne’ebé hala’o ona iha tinan 2021 no 2022 hodi prodús ona emprezáriu hamutuk 44 komposta hosi 29 hosi kompetisaun dahuluk no 15 hosi kompetisaun faze daruak.
Objetivu hosi kompetisaun mak atu haburas, promove no hasa’e kresimentu ekonomia lokál, promove produtividade no haburas setór produtivu sira hanesan agrikultura no peska, fornese kampu serbisu inklui hakbiit empreza lokál sira.
Prioridade ba kompetisaun planu negósiu sei foka ba área produtivu sira hanesan indústria kiik, agrikultura, peska, pekuária no turismu ne’ebé sei fó vantajen ba emprezáriu mikro, pekena no médiu, kooperativa no grupu joven sira hodi hetan insentiva hanesan ekipamentu ne’ebé presiza.
Tuir planu manán-na’in sei hetan ekipamentu ka materiál ba negósiu ho valór orsamentu rihun $1 to’o rihun $10 tuir proposta ka planu negósiu ne’ebé trasa ona.
Programa refere MTKI hala’o serbisu hamutuk ho autoridade munisipál haat, UNDP-PNUD, KOICA no Institutu Apoia Dezenvolvimentu Emprezárial (IADE) ne’ebé sei remata rejistu iha loron-16 fulan-setembru.
Gilberto do Carmo nu’udar partisipante hosi suku Com, postu admistrativu Lautém, munisípiu Lautém ne’ebé selesiona iha área guest house konsidera kompetisaun inovativu ne’ebé realiza hosi MTKI sai oportunidade ba juventude sira atu hato’o planu negósiu no bainhira sai vensedór bele ajuda fundu hodi hadi’a di’ak liutan ekonomia uma laran.
Jornalista : Natalino Belo
Editór : Evaristo Soares Martins
