MEJD sei inaugura eskola lima iha Covalima
COVALIMA, 09 novembru 2022 (TATOLI)–Ministru Edukasaun Juventude no Desportu (MEJD) sei inaugura eskola lima (5) iha munisípiu Covalima iha fulan-novembru nia rohan, liuhosi konstrusaun no reabilita eskola liuhosi projetu komunitáriu.
Diretór Servisu Edukasaun Munisípiu Covalima, Rui Suri Seran, informa eskola ne’ebé konstrui no reabilita liuhosi projetu komunitáriu atu inuagura ne’e mak hanesan eskola Macocon, Lontale, Akar Laran Zumalai no Maucola tanba progresu taka ona kalen
“Ha’u foin simu relatóriu eskola fulan novemvru ne’e nia rohan, ministru sei halo inuagurasaun ba eskola lima ne’e, tanba agora sira taka ona kalen no balun hahú revoka ona no atu tama ona prosesu atu finaliza,” Diretór ne’e relata progresu konstrusaun ba Agência Tatoli iha nia kna’ar fatin, Santa Rosa, kuarta ne’e.
Hafoin finaliza inaugura eskola lima (5) kontinua sei inaugura mós eskola sira-ne’ebé sei iha prosesu konstrusaun, tanba materiál sira-ne’e buka iha Dili laiha no iha Kupang mós sei hein ida-ne’e mak sai problema boot.
Maske hosoru difikuldade kona-ba sosa materiál konstrusaun eskola sira-ne’e, maibé prosesu konstrusaun projetu kominitáriu iha Covalima la’o di’ak.
Razaun implementa projetu komunitária la’o di’ak, tanba prosesu konstrusaun jeralmente atinje ona 50% tanba foti ona osan ba faze daruak, nune’e progresu konstrusaun atu tama ona 75%.
Antes ne’e, iha loron 7 fulan-outubru 2021, Vise Ministru Edukasaun Juventude no Desportu asina kontratu ho grupu kominitária 15 ne’ebé atu reabilita no konstrui eskola-15 mai hosi OJE 2021, ne’ebé prevee iha transferénsia públika, grande projetu mai hosi rubrika fundu infreestrutura nian no konstrui eskola CAFEE haat (4).
Orsamentu atu halo reabilitasaun no konstrusaun eskola hamutuk 15 iha munisípiu Covalima ho totál hamutuk millaun $1,6
Jornalista : Celestina Teles
Editór : Cancio Ximenes
