iklan

Uncategorized

PN aprova proposta lei OJE 2023 iha faze jeneralidade

PN aprova proposta lei OJE 2023 iha faze jeneralidade

Votasaun jeneralidade proposta OJE tinan 2023 iha sala plenáriu PN, kuarta (09/11). Imajen TATOLI/Francisco Sony.

DILI, 09 novembru 2022 (TATOLI)–Parlamentu Nasionál (PN), liuhosi reuniaun plenária, kuarta ne’e, aprova proposta-lei númeru 46/V(5a) Orsamentu Jerál Estadu (OJE) 2023 iha faze jeneralidade ho votu a-favór  40  kontra 0 no abstensaun 24.

“Nune’e proposta lei OJE 2023  pasa iha jeneralidade tanba aprovadu iha jeneralidade ita kontinua faze espesialidade tuir ajenda aban iha tuku 15:00,” Prezidente PN, Aniceto Longuinhos Guterres Lopes, fó sai iha sala plénaria PN.

Xefe Bankada Fretilin, David Dias Ximenes ‘Mandati’, hateten ohin ita halo diskusaun   OJE atu aprova iha jeneralidade ida ne’e importante tebes atu  sustenta ita-nia estadu iha tinan oin  no nesesidade povu nian  garante moris di’ak povu nian.

Nia konsidera montante proposta lei OJE boot tebes tanba nesesidade bo’ot maibé nafatin ezekusaun mak tenke ho resposabilidade no kualidade.

Deputadu CNRT, Leandro Lobato, dehan bankada CNRT konsidera oitavu Governu  ninia kapasidade ezekusaun OJE 2022   ki’ik tebes afeta ba ekonomia Timor-Leste tanba ekonomia  rai laran depende orsamentu estadu maibé la akontese no tinan oin sei iha eleisaun lejislativa mai husu tan montante OJE bo’ot tebes.

Xefe Bankada Khunto, Olinda Guterres, mós defende katak louva serbisu Primeiru Ministru no oitavu Governu konstituisional ne’ebé konsege aprova lei enkuadramentu orsamentu ho lei grande opsaun planu hodi aprezenta proposta lei OJE.

Deputadu PLP, Noé da Silva, nia  intervensaun ikus debate proposta OJE 2023 iha faze jeneralidade  hato’o kongratulasaun ba serbisu tomak  ne’ebé oitavu Governu no lori proposta lei OJE nu’udar proposta ba mandatu ikus ne’ebé lidera hosi Primeiru Ministru, Taur Matan Ruak.

Deputadu PUDD, António de Sa Benevides, hateten observasaun proposta lei ne’ebé Governu aprezenta billaun $3.2 mai PN atu aprova no orsamentu ne’e ho nia lema investimentu produtivu no kresimentu inkluzivu ba jerasaun futuru, hosi montante osan ne’e billaun $1 ba fundu veteranu no  billaun $2 ba  gasta ba despeza Estadu.

Nia fó sai katak, PUDD sei prepara proposta haat iha debate espesialidade hodi hasai tiha osan ne’ebé prevee atu sosa kareta prado ba deputadu sira hodi aloka ba SEFOPE tau ba formasaun joven, akizasaun livru ba biblioteka, fasilita kreditu  ba joven  ne’ebé hakarak kontinua eskola ne’ebé kbiit laiha, no  proposta ikus ba akizasaun medikamentu ba moras mentál.

Deputadu UDT, Francisco Carlos Xavier, dehan  iha diskusaun jeneralidade loron tolu halo observasaun badak dahuluk apresia diskursu Primeiru Ministru loron dahuluk nian refere hato’o planu hanesan kompromisiu lori esperansa ba povu nune’e  UDT hein ho proposta OJE montante boot tebes bele konkretiza ne’ebé ita hotu mehi lori moris di’ak povu hotu nian.

Deputada Frente Mudança, Isabela Ximenes, hato’o apresiasaun ba Xefe Governu mai iha PN hodi aprezenta proposta lei OJE ne’e no  komisaun C nia relatóriu ho faktu barak Governu presiza foti importante.

Nia konsidera proposta lei OJE hanesan  ikus ne’ebé oitavu Governu aprezenta no mandatu ikus lejislatura nian debate iha jeneralidade no proposta lei OJE nu’udar instrumentu ba Estadu hodi lori nasaun hases hosi problema nasaun ho gradualmente hanesan má-nutrisaun, edukasaun no seluk tan.

Maibé, Nia konsidera montante proposta  OJE bo’ot tebes no liga osan fundu mina rai sustentabilidade iha perígu nia laran kada tinan hamis hela de’it bele mohu iha 2034 tuir aprezentasuan hosi Ministéiru Finansa, nune’e situasaun ne’e  halo ita hotu hanoin oinsa prolonga vida fundu petrolífeiru nian. diversifika ekonomia iha setór produtivu hodi lori sustentavilidade.

Nia afirma, pozisaun Frente Mudansa sei vota abstensaun  ba proposta lei OJE iha jeneralidade tanba ho razaun oitavu Governu nia kapasidade ezeksaun OJE 2022 sei fraku, ida ne’e signifika jestaun orsamentu liña ministeriu nia planemanetu seida’uk di’ak.

No mós tinan oin sei hasoru prosesu eleisaun parlamentár hasoru kampaña polítiku.

Deputadu PD, António da Conceição, ‘Kalohan’, hateten proposta lei OJE nu’udar  orsamentu ikus hodi finansia atividade dezenvolvimentu nasionál mandatu ikus oitavu Governu nian.

Enkuantu, proposta OJE 2023 ho montante billiaun $3,16 kompostu husi orsamentu administrasaun sentrál billiaun $2,8 (montante ne’e inklui ona Fundu Kombatente Libertasaun Nasionál, billiaun $1), orsamentu seguransa sosiál hetan alokasaun millaun $235,7 no RAEOA millaun $120.

Orsamentu ne’e sei  uza hodi finansia programa 45 liuhosi atividade prinsipál 275, organizadu  iha área estratéjiku  16 ne’ebé Governu sei foku ba iha tinan oin hanesan agrikultura, pekuária, peska no floresta, ekonómia no empregu, turizmu, dezenvolvimentu rurál no abitasaun, ambiente, petróliu no minerál, eletrisidade no enerjia renovável, konektividade nasionál, bee no saneamentu, edukasaun no formasaun, saúde, inkluzaun no protesaun sosiál, kultura no patrimóniu, reforma Estadu, defeza no seguransa nasionál, relasona internasionál no polítika esterna.

Proposta OJE ba tinan oin  oitavu Governu prepara ba dahuluk  bazeia ba regra orsamentál foun aprovadu husi Lei Enkuadramentu Orsamentál.

Proposta orsamentu ne’e kontempla ona orsamentu tuir programa no alokasaun orsamentu ba prioridade nasionál ne’ebé mak define ona iha lei grande opsaun planu 2023.

Proposta ne’e mai ho lema investimentu produtivu no ‘kresimentu inkluzivu ba jerasaun futuru’ aprezenta distribuisaun rekursu nasionál ne’ebé justu no ekuitativu hodi mellora prestasaun serbisu, rekuperasaun ekonómiku no reziliénsia, promove kresimentu ekonómiku ida ne’ebé inkluzivu no sustentável iha mediu prazu.

Proposta OJE ne’e Governu aloka millaun $17 ba konstrusaun, reabilitasaun no manutensaun estrada no ponte sira iha área rurál, millaun $15 ba konstrusaun estrada nasionál Pante Makasar, millaun $7,8 ba reabilitasaun estrada munisipál entre Laga no Baguia hamutuk kilometru 30, inklui mós inisiativa sira seluk ho intensaun atu kontinua implementa programa konstrusaun estrada, ponte no ligasaun rede elétrika nasionál iha territóriu laran tomak.

Atu garantia katak to’o iha 2030 populasaun sira hotu iha rai-laran iha asesu ba eletrisidade nasionál ho presu ne’ebé baratu no enerjia renovável ho eskala ki’ik liuhusi EDTL, iha proposta orsamentu ba tinan oin, Governu aloka ona millaun $118.

Iha tinan oin, Governu mós aloka ona orsamentu millaun $25 hodi aselera diversifikasaun ekonomia, millaun $14,5 investe iha setór telekomunikasaun, millaun $6,4 hodi promove produsaun nasionál, millaun $2 aloka ba kriasaun balkaun úniku ba rejistu empreza no millaun $1,3 hodi harii parke indústria.

Governu mós investe millaun $21 iha setór agrikultura atu apoiu aumentu produsaun no produtividade ne’ebé sustentável ho intensaun atu redus pobreza, hasa’e seguransa alimentár no promove kresimentu ekonómiku iha área rurál.

Millaun $3,6 ba sistema irrigasaun Laivai no millaun $2,6 ba Galata, no apoiu estensaun área agrikultura ho orsamentu alokadu millaun $2,6 no millaun $2,1 hodi dezenvolve zona agrikultura integradu iha área irrigasaun.

Kapitál sosiál Hhtan alokasaun 36%

Distribuisaun tetu agregadu orsamentu administrasaun sentrál iha OJE 2023, setór kapitál sosiál ne’ebé inklui saúde, edukasaun no protesaun sosiál hetan alokasaun millaun $772 ka 36%, setór ida ne’e mak maiór benefisiáriu husi finansiamentu proposta OJE 2023.

Ida-ne’e refleta importánsia ne’ebé mak Governu fó ba iha asesu universál ba edukasaun ne’ebé kualidade millaun $137, saúde millaun $92 no protesaun sosiál millaun $301, liuliu ba grupu vulnerável.

Governu propoin ba Parlamentu Nasionál orsamentu ho montante millaun $19,2 hodi implementa programa Bolsa da Mãe,  husi montante ne’e millaun $5,3 sei aloka ba kontinuasaun programa inísiu no millaun $13,7 sei aloka ba espansaun Bolsa da Mãe Jerasaun Foun, ne’ebé nia objetivu mak atu apoiu inan isin-rua no mellora saúde no nutrisaun durante inísiu loron rihun-ida nomós apoiu labarik ho moras króniku no defisiénsia.

Programa nutisaun aetan alokasaun millaun $10

Iha Proposta OJE  ne’e Governu propoin programa nutrisaun millaun $10, ida-ne’e reprezenta aumentu 𝑞𝑢𝑎𝑡𝑟𝑜 𝑣𝑒𝑧𝑒𝑠 ka porsentu  (400%) kompara ho orsamentu alokadu ba programa nutrisaun iha OJE 2022.

Proposta OJE ne’e mós kobre alokasaun orsamentu millaun $22,4 hodi espande programa merenda eskolár, mellora kualidade hahan hodi alkansa labarik sira nia kualidade nutrisaun, hasa’e despeza ba kada labarik no kada hahan husi $0,25 to $0,42.

Proposta OJE ne’e formula bazeia ba objetivu estratéjiku husi Governu ne’ebé nia objetivu atu fornese sidadaun sira oportunidade atu iha moris saudável, seguru no moris naruk, asesu ba koñesimentu, teknolojia no inovasaun, no asesu ba rekursu sufisiente hodi garantia vida moris ida ne’ebé dignu.

Introdusaun impostu iha proposta OJE 2023

Liuhusi proposta OJE ne’e Governu propoin ba Parlamentu Nasionál atu hasa’e impostu seletivu konsumu foun ne’ebé inklui; 10% impostu ba karreta ho valór liu  $10.000,  20% ba karreta ho valór liu  $25.000, 30% ba karreta ho valór liu $50.000.

No aumentu iha impostu konsumu ba tabáku no produtu tabáku seluk husi $50 kada kilograma sa’e ba $100 kada kilograma.

Impostu konsumu foun $1.00 kada kilograma ba masi-midar, introdusaun impostu konsumu foun ho valór $3 kada litru ba bebida asukarada hanesan fanta, kokakola, sunkist, sprite no seluk tan, ida ne’e Governu introdus atu proteje sidadaun sira nia saúde públiku.

Aleinde ne’e, Governu mós propoin atu hasa’e impostu importasaun husi 2,5% ba 5%.

Liuhusi introdusaun impostu hirak ne’e, Governu halo projesaun katak reseita doméstika sei sa’e husi millaun $153,7 iha 2022, ba millaun $174,9 iha 2023.

Introdusaun impostu hirak ne’e sai nu’udar instrumentu fiskál ida ne’ebé Governu uza atu hasa’e koleksaun reseita doméstika iha tinan hirak tuir mai hodi redús dependénsia ba fundu minarai.

Medida hirak ne’e mós aliña ho polítika reforma fiskál no jestaun finansa públika no reforma importante ida ne’ebé inísia ona husi sestu Governu iha 2015 no oitavu Governu komprometidu atu kontinua implementa.

Jornalista : Nelson de Sousa

Editór         : Cancio Ximenes

iklan
iklan

Leave a Reply

iklan
error: Content is protected !!