iklan

EDUKASAUN, COVALIMA

UNICEF-MEJD distribui ai-oan ba eskola 12 iha Covalima

UNICEF-MEJD distribui ai-oan ba eskola 12 iha Covalima

Sekretáriu Munisípiu Covalima, Francisco de Jesus Alves, entrega ai-oan ba estudante sira. Imajen Tatoli/Celestina Teles.

COVALIMA, 09 novembru 2022 (TATOLI)–UNICEF iha Timor-Leste servisu hamutuk ho Governu liuhosi Ministériu EDukasaun Juventude no Desportu (MEJD) hala’o lansamentu hodi distribui ai-oan ba eskola 13 iha munisípiu Covalima.

Aleinde ne’e, antes ne’e UNICEF mós distribui ai-oan ba eskola sira iha munisípiu Bobonaro hamutuk 14, eskola lima (5) iha Dili no eskola iha Covalima hamutuk 12, ne’ebé ho total eskola hamutuk 30 mak simu ona ai-oan.

“UNICEF kolabora ho Governu liuhosi Ministériu Edukasuan Juventude no Desportu (MEJD)  no Meiu Ambiente, suporta ai-oan  hodi fornese ba iha eskola 30 iha munisípiu Bobonaro Covalima no Dili hodi hamatak no proteje bee-matan ne’ebe UNICEF apoiu ona,” Offisial Wash Education UNICEF,  Gertrudis Noviana Mau, hato’o ba jornalista sira, iha salaun enkontru Administrasaun Munisípiu Covalima (AMC), kuarta ne’e.

Lansamentu apoiu ai-oan iha Covalima ne’e hodi nomea munisípiu tolu maibé kada eskola sei hetan ai-oan 25, ne’ebe ba eskola 30 ne’e kuaze ai-oan hun 750, ho tipu ai-oan mak hanesan Rambutan, Sabraka no ai-Kerucut.

UNICEF distribui ai-oan ba eskola sira-ne’e, ne’ebé suporta komunidade Portugál liuhosi UNICEF hodi prezerva bee-moos, hadi’a saniamentu no fó formasaun ba estudante sira ba jestaun fase-liman ho sabaun no kuidadu ambiente.

Ho nune’e, tinan UNICEF suporta hodi distribui ai-oan ba eskola 30 maibé sei iha oportunidade no la taka dalan ba eskola sira seluk, tanba UNICEF hanesan organizasaun ne’ebé apoiu ba labarik sira iha mundu tomak inklui Timor-Leste.

Sekretáriu Munisípiu Covalima, Francisco de Jesus Alves, reforsa programa lansamentu apoiu  ai-oan ne’e bele eduka estudante sira atu kuidadu ambiénte iha ida-idak nia eskola fatin.

“Ohin, ita hahú ho buat ki’ik maibé ho nia impaktu no ba futuru di’ak ba ita hotu, ba estudante  no ba profesór iha eskola ida-idak. Tanba ne’e, hosi UNICEF ho parte edukasaun mai iha Covalima halo sensibilizasaun ba eskola verde. Bainhira ladún tau prióridade, ita haree programa ne’e importante hodi eduka estudante sira hodi kuidadu ambiénte, nune’e eskola sai matak no buras,” nia hateten.

Ho nune’e, nia orienta ba parte hotu atu kuidadu ai-oan no kuda iha eskola no tenke kuidadu nune’e implementa programa ne’e bele susesu, nune’e Sekretáriu Estadu Meiu Ambiente sei iha programa lubuk-ida no bainhira la susesu mak programa ida-ne’e atu kontinua mós susar.

Eskola 12 iha munisípiu Covalima ne’ebé hetan apoiu ai-oan hanesan Eskola Báziku Filiál (EBF) Koitau, EBF Salele, EBF Ai-Oan, EBF Tilomar, EBF Foho Rua, EBF Baer, EBF Fatuk Metan, EBF Foho Lulik, EBF Traducama, EBF Bubur Laran, EBF Haemanu no EBF Maucola.

Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!