iklan

DILI, POLÍTIKA

Debate espesialidade proposta OJE 2023, meza PN simu ona proposta 90

Debate espesialidade proposta OJE 2023, meza PN simu ona proposta 90

Vise Prezidente Parlamentu Nasionál Deputada Maria Angelina Lopes Sarmento.Imajen/TATOLI

DILI, 09 novembru 2022 (TATOLI)—Meza Parlamentu Nasionál (PN) simu ona proposta por volta 90 hosi deputadu sira iha debate faze espesialidade ba proposta lei Orsamentu Jerál Estadu (OJE) 2023.

Notísia Relevante: Ohin, PN-Governu debate proposta-lei OJE 2023 iha faze espesialidade

“Informasaun númeru proposta por volta 80 ka 90 mak submete ona ba mai meza Parlamentu Nasionál,” Vise Prezidente PN, Maria Angelina Sarmento, informa ba jornalista sira iha PN, kinta ne’e.

Proposta hosi deputadu sira-ne’e balun husu atu halo alterasaun ba artigu balun iha proposta lei númeru 46/V(5a) Orsamentu Jerál Estadu (OJE) 2023 no balun husu elimina tiha no tau fali ba nesesidade seluk.

“Ida-ne’e ha’u seidauk haree detallu maibé klaru iha proposta alterasaun ba artikuladu katak hosi artigu sira proposta PPL agora iha artigu 10 de’it,” nia dehan.

Tuir Vise PN, ho lei foun enkuadramentu orsamentál nune’e diferensa ninia klasifikadór orsamentál.

“Ita hatene tinan ida-ne’e Governu ninia klasifikadór orsamentál diferensa ona la hanesan ho ida uluk, Ne’ebé, prosesu ida-ne’e ami mós sei foun hotu ba ami deputadu sira. Ida-ne’e foin primeira vez lei LEO kompletamente diferensa ne’ebé ami mós hala’o hela diskusaun, akompaña no observa lala’ok ninia hodi apar diskusaun no proposta sira,” nia hateten.

Entertntu PN ho Governu, kinta ne’e, hala’o debate proposta Lei númeru 46/V(5a) Orsamentu Jerál Estadu (OJE) 2023 ba loron dahuluk iha faze espesialidade.

Tuir ajenda ne’ebé Agéncia Tatoli asesu debate ne’e sei hahú iha tuku 15:00 lorokraik iha PN, no debate espesialidade sei termina iha loron 18 novembru tinan ne’e.

Debate espesialidade sei hala’o diskusaun espesífiku ba proposta lei OJE 2023 kada artigu.

Metodolojia diskusaun no votasaun iha espesialidade hahú hosi kapítulu I Dispozisaun inisiál), artigu 1 Objetu no ambitu, kapítulu II Orsamentu Jerál Estadu, artigu 2 aprovasaun tabela orsamentál hanesan iha tabela I reseita setór públiku administrativu, sub-setór, tabela II despeza setór públiku administrativu, sub-setór, tabela III despeza setór públiku administrativu, klasifikasaun funsional, tabela IV reseita sub-setór administrasaun sentrál, klasifikasaun ekonomika.

Tabela V despeza sub-setór administrasaun sentrál, klasifikasaun organika no estrutura por programa, tabela VI despeza sub-setór administrasaun sentrál, klasifikasaun ekonomika, tabela VII reseita sub-setór seguransa sosiál, tabela VIII despeza sub-setór seguransa sosiál.

Tabela IX despeza sub-setór seguransa sosiál, tabela X reseita sub-setór Rejiaun Administrativa Espesiá; Óe-Cusse Ambeno (RAEOA), tabela XI anexu prezente lei halo parte integrante, ho despeza sub-setór RAEOA, klasifikasaun organika no estrutura programa, tabela XII anexu prezente lei hola parte integrante, ho despeza sub-setór RAEOA, ho klasifikasaun ekonomika.

Atigu 3 impostu, taxa no kontribuisaun, artigu 4 transferénsia fundu petrolífeiru, artigu 5 dívida públika, artigu 6 transferénsia sub-setór.

Kapítulu III orsamentu seguransa sosiál artigu 7 transferénsia saldo seguransa sosiál, kapítulu IV dispozisaun finál, artigu 8 alterasaun organika, artigu 9 kontrolu parlamentár no artigu 10 tama iha vigót no produsaun efeitu.

Enkuantu, proposta lei OJE 2023 PN hala’o ona aprovasaun iha jeneralidade ho votu a-favór 40 kontra 0 no abstensaun 24.

Enkuantu, proposta OJE 2023 ho montante biliaun $3,16 kompostu hosi orsamentu administrasaun sentrál biliaun $2,8 (montante ne’e inklui ona Fundu Kombatente Libertasaun Nasionál, billiaun $1), orsamentu seguransa sosiál hetan alokasaun millaun $235,7 no RAEOA millaun $120.

Orsamentu ne’e sei  uza hodi finansia programa 45 liuhosi atividade prinsipál 275, organizadu  iha área estratéjiku 16 ne’ebé Governu sei foku ba iha tinan oin hanesan agrikultura, pekuária, peska no floresta, ekonómia no empregu, turizmu, dezenvolvimentu rurál no abitasaun, ambiente, petróliu no minerál, eletrisidade no enerjia renovável, konektividade nasionál, bee no saneamentu, edukasaun no formasaun, saúde, inkluzaun no protesaun sosiál, kultura no patrimóniu, reforma Estadu, defeza no seguransa nasionál, relasona internasionál no polítika esterna.

Jornalista : Nelson de Sousa

Editór      : Cancio Ximenes  

 

iklan
iklan

Leave a Reply

iklan
error: Content is protected !!