Diretór Polítika Defeza enkoraja feto foin-sa’e Viqueque partisipa iha vida militár
VIQUEQUE, 10 novembru 2022 (TATOLI)—Diretór Nasionál Polítika Defeza hosi Ministériu Defeza (MD), Juvénio Guerra, enkoraja feto foin-sa’e sira iha munisípiu Viqueque hodi prepara-an partisipa iha vida militár.
“Ami halo sensibilizasaun ba estudante sira hodi enkoraja feto nia partisipasaun iha vida militár. Ita haree partisipasaun feto iha militár ho persentajen kiik liu, enkuantu ita-nia polítika atu inklui feto iha militár ho persentajen 40%, maibé iha nível rekrutamentu sai mínimu liu no daudaun envolvimentu feto iha militár foin atinje 11%. Tanba ne’e, ita enkoraja feto sira hodi prepara-an ba vida militár,” Diretór hateten iha atividade sensibilizasaun, iha salaun parokia Tilou, Viqueque Vila, kinta ne’e.
Nia konsidera, partisipasaun juventude tantu feto no mane iha vida militár importante tebes tanba hola parte hotu iha MD nia programa tolu hanesan polítika defeza, boa governasaun no polítika igualdade jéneru.
“Daudaun ita opta ona rezolusaun 13/25, ne’ebé fó oportunidade boot ba feto sira tantu iha militár, envolvimentu foti dezisaun sira no kualker envolvimentu iha vida polítika ba kontribuisaun dezenvolvimentu iha nasaun Timor-Leste,” nia dehan.
Notísia relevante: Rekrutamentu F-FDTL turnu daruak 2022 depende ba orsamentu
Nune’e, nia husu joven sira teke luta hodi eskola ho di’ak, kuidadu-an no saúde, labele envolve iha aktu violetu hodi aban bain-rua iha rekrutamentu militár bele aplika ba prosesu rekrutamentu tanba Estadu presiza forsa hodi asegura nasaun.
“Atu tama ba militár tenke ho saúde di’ak, labele moras. Tanba ne’e ami sensibiliza joven sira hodi kuidadu saúde no hadook-an hosi hahalok violetu, tanba agora daudaun la’ós tempu violentu ona. Joven maka sai futuru nasaun, nune’e tenke kria pás no estabilidade hodi lori nasaun ba oin,” nia akresenta.
Iha fatin hanesan, Diretór Sentru Juventude munisípiu Viqueque, Januário Benivides de Araújo, konsidera, atividade sensibilizasaun hosi MD ne’e importante hodi kaderniza joven sira, liu-liu feto hodi prepara-an ba partisipasaun iha vida militár.
“Ha’u hanoin sensibilizasaun ne’e importante atu joven sira bele prepara-an, nune’e bainhira mosu rekrutamentu ruma, joven feto sira bele partisipa. Molok to’o ne’ebá tenke mós prepara-an no saúde inklui presiza hametin nafatin espíritu nasionál. Ba oin sentru juventude munisípiu Viqueque sei halo edukasaun sívika atu joven sira bele kompreende kona-ba sidadania no respeita malu atu bainhira tama serbisu bele hatudu atitude di’ak,” nia tenik.
Atividade ne’e realiza hosi MD ho kolaborasaun hosi Intituisaun FALINTIL-Forsa Defeza Timor-Leste (F-FDTL) no Sekretaria Estadu Juventude no Desportu (SEJD), ne’ebé realiza ona iha munisípiu Baucau no Viqueque, no sei ba kontinua iha munisípiu seluk to’o ramata iha Oé-cusse.
Atividade ne’e hetan partisipasaun hosi estudante Eskola Sekundária Santo Estevão Viqueque Vila no Eskola Ensinu Sekundáriu Jerál (ESJ) 04 setembru, ne’ebé akompaña hosi Komandante Polísia Nasionál Timor Leste (PNTL) Eskuadra postu Viqueque Vila.
Jornalista : Vitorino Lopes da Costa
Editora : Julia Chatarina
