FONGTIL identifika Governu ladún investe iha setór edukasaun-agrikultura
COVALIMA, 10 novembru 2022 (TATOLI)–Forum Origanizasaun Naun Governamentál (FONGTIL) liuhosi nia membru identifika Governu ladun investe ba setór argikultura no edukasaun iha Covalima.
“FONGTIL identifika katak Governu ladun investe iha setór edukasaun hodi implementa programa merenda eskola la tuir menu. Alunu barak liu iha eskola liu ona padraun internasionál no agrikultura sai isu boot, Governu ladun investe di’ak,” Ofisiál Advokasia FONGTIL, Jorge Madeira, hateten ba jornalista sira iha salaun CVTL Covalima, Kampung Baru, kinta ne’e.
Razaun ONG identifika setór agrikultura sai asuntu ne’ebé boot ladun investe di’ak iha Covalima tanba estensionista iha suku hotu la halo servisu ho di’ak, maske tratór iha no Covalima Governu tau kondisaun maibé komunidade kontinua ense kombustível.
Haree ba setór edukasaun ne’e, FONGTIL identifika iha eskola alunu barak liu ona no implementa programa merenda eskolár kada estudante ho de’it sentavu 0,25, ho nune’e membru sira identifika estudante konsume la tuir menu hosi ministériu ho padraun internasionál.
Ho asuntuk hirak ne’e, FONGTIL sei relata ba Ministériu Edukasaun Juventude no Desportu (MEJD) no Ministériu Agrikltura no Peska (MAP) atu haree situasaun refere, atu labele akontese tan iha Covalima no munisípiu sira seluk.
“Tanba hanesan setór agrikultora atu subtitui ita-nia ekonomia rai ida-ne’e labele laran metin ba ajénsia internasionál, Governu tenke investe hodi hasa’e ita-nia produsaun rai-laran no hanesan setór edukasaun futuru nasaun ida-ne’e nian tenke edukasaun ne’ebé di’ak atu bele ukun rai ida-ne’e,” nia dehan.
Tuir dadus, oras ne’e daudaun membru ONG lima mak sei kontinua ativu mak hanesan ONG Hakom, Centro Comunidade Covalima, Rede Covalima, Esperansa no HTL, seluk la ativu ona tanba impaktu hosi pandemia COVID-19 laiha orsamentu.
“Impaktu hosi pandemia COVID-19, ami-nia membru sira sofre balun laiha doadór maibé hanesan sosiédade sivil ami-nia dever morál kontinua halo kontrolu sosiál nafatin,” nia hateten.
Jornalista : Celestina Teles
Editór : Cancio Ximenes
