iklan

INTERNASIONÁL, HEADLINE, OÉ-CUSSE (RAEOA), POLÍTIKA

Inovasaun lima iha Insana Indonézia sei haforsa polítika suku Amasat iha RAEOA

Inovasaun lima iha Insana Indonézia sei haforsa polítika suku Amasat iha RAEOA

Autoridade lokál diskute inovasaun lima iha Insana haforsa polítika suku Amasat iha RAEOA. Imajen Tatoli/Abílio Elo Nini.

KEFAMENANU 10 novembru 2022 (TATOLI) – Delegasaun hosi Rejiaun Administrativa Espesiál Oé-Cusse Ambeno (RAEOA), lideradu Adjuntu Presidente Autoridade, Maximiano Neno hamutuk ho xefe suku no jestór sub-rejionál sira, kuarte ne’e vizita ofisiál ba sub-rejiaun Insana, distritu Timur Tengah Utara (TTU), provínsia Nusa Tenggara Timur, Repúblika Indonézia.

Objetivu hosi vizita ofisiál ne’e hanesan estudu komparativu, atu observa no promove diskusaun ho autoridade komunitária sira iha sub-rejiaun Insana kona-bá organizasaun administrativu iha sub-rejiaun to’o suku, nu’udar polítika ida atu reforsa implementasaun programa promosaun suku Amasat ne’ebé daudaun iha RAEOA.

Hosi inovasaun lima ne’e maka hanesan, inovasaun kona-bá fatin literasaun Insana, avalisaun hosi jestór ba prosesu dezenvolvimentu iha suku sira, atividade hamenus kazu má-nutrisaun, atividade vasinasaun ba labarik sira  no ikusliu maka inovasaun ba suku sira tenke hili programa prioridade ida iha suku idak-idak iha suku iha suku 16 ne’ebé rejiste iha sub-rejiaun Insana rasik.

Adjuntu Prezidente Autoridade RAEOA ba Asuntu Sosiál, Maximiano Neno, agradese ba Autoridade TTU tanba bele autoriza hodi halo vizita ofisiál iha sub-rejiaun Insana, atubele hala’o estudu komparativu.

Maximiano Neno informa, vizita ofisiál ne’e hanesan hanesan polítika ida hosi autoridade RAEOA atu promove xefe suku no jestór sira atu hetan referénsia ruma hosi rai viziñu, tanba daudaun ne’e RAEOA deklara apoia fundu ba suku sira atu dezenvolve suku rasik liuhosi Programa Promosaun Suku Amasat (suku furak no kapaas).

Tanba objetivu hosi programa suku Amasat ne’e atu promove komunidade iha suku 18 ho aldeia 63, atu partisipa direta iha serbisu nível suku ho kreativu, inovativu, independente, inkluzivu no sustentável.

Nune’e mós programa ne’e atu hatene partisipasaun konsellu suku no komunidade iha suku ba dezenvolvimentu no progresu kualidade moris nian, iha setór saúde, edukasaun, sosiál, kultura, turizmu komunitária seguransa no ordén públika.

“Objetivu hosi vizita mai iha sub-rejiaun Insana hanesan kontinuasaun tanba antes ne’e Governu Timor-Leste ho indonézia selebra ona akordu ho intensaun atu hametin relasaun lasu amizade, tán ne’e ho prezensa delegasaun ne’e bele hametin liutan kooperasaun entre RAEOA ho NTT kona-bá bisnis forum ne’ebe selebra ona iha fulan jullu, ho rekomendasaun importante lubuk ida, ho kooperasaun ne’e presiza dezenvolve nune’e iha futuru bele ita bele implementa di’akliu tán ho programa sira seluk, hanesan zona free trade daudaun ne’e diskute hela ba faze implementasaun iha liña fronteira,” nia katak.

Responsabél másimu ekipa delegasaun ne’e, fundamenta, objetivu seluk hosi vizita ne’e realiza mós estudu komparativu, atu haree prosesu dezenvolvimentu ne’ebé konsege hala’o ona iha TTU espesialmente iha sub-rejiaun Insana nune’e mós saida mak RAEOA halo ona ita bele estuda hamutuk hodi kompleta ba malu.

Jestór sub-rejiaun Insana, Alexandre Y.L Tabesi, esplika, atividade prinsipál lima maka daudaun ne’e sub-rejiaun Insana implementa tanba fasilidade hotu prepara hosi sub-rejiaun no hetan apoia fundu orsamentu hosi Governu Indonézia nian.

Lideransa komunitária ne’e informa, inovasaun lima daudaun ne’e implementa iha sub-rejiaun Insana primeiru inovasaun kona-bá fatin literasaun Insana.

Fatin ne’e halo no prepara hosi jestór sub-rejiaun Insana atu halo fatin literasaun ba komunidade sira bele hasa’e koñesimentu liuhosi estuda, bele lee, hakerek, no asesu online gratuita, hodi reforsa abilidade rekursu umanu.

Tanba inovasaun fatin asesu liña internete no sala biblioteka ne’e fasilita gratuitamente hosi Governu Indonézia, entaun subsídiu ka fundu iha sub-rejiaun ne’e mak halo jestaun nune’e bele fasilita foinsa’e sira no komunidade iha Insana.

Nia informa, fatin literasaun ne’e bainbain vizita barakliu mai hosi estudante no joven sira inklui komunidade babain iha sub-rejiaun Insana, bainhira presiza buka hatene tanba iha fatin literasaun ne’e kompleta ho biblioteka.

Inovasaun daruak maka atividade jestór nian iha suku sira, kada semana jestór sub-rejiaun hamutuk ho ekipa hala’o vizita ofisiál ba suku sira hotu atu observa no hadi’a progresu serbisu administrsaun no programa prioridade sira iha suku sira liu-liu kona-bá setór agrikultura, edukasaun saúde no infraestrutura bázika nian, tanba programa hirak-ne’e hotu implementa uza osan Estadu nian.

Jestór sub-rejiaun Pante Makasar, Eurico da Costa Bobo, agradese ba autoridade sira iha sub-rejiaun Insana tanba bele fasilita aprezenta rezultadu no progresu serbisu sira-ne’ebé konsege hala’o ona iha sub-rejiaun ne’e.

“Ami hanesan jestór apresia tebes ho programa sira ohin aprenzenta ona, daudaun ne’e iha Oé-Cusse ami mós hahú implementa programa suku Amasat (suku furak no kapaas), atividade kuaze la’o hanesan, tán ne’e maka ami mai atu hetan referénsia balu hosi rai viziñu,” nia orgullu.

Tuir observasaun jornalista Agência Tatoli katak, iha sorumutu parte rua konsege halo diskusaun no diálogu aberta kuaze oras ida, hodi deskuti kona-bá lala’ok implementasaun programa prioridade lima to’o nia finalidade ho susesu.

Entretantu, kalendáriu ba estudu komparatu ne’e, hahú iha loron kinta 10 to’o sábadu 12 novembru 2022, no ekipa delagasaun ne’e fahe ba ekipa rua, ekipa dahuluk xefia hosi Adjuntu Prezidente Autoridade ba Asuntu Sosiál RAEOA, Maximiano Neno, lidera ema na’in-22 halo estudu komparativu iha distritu TTU.

Nune’e mós ekipa daruak xefia hosi Sekretáriu Rejionál ba Asuntu Administrasaun, Martinho Abani Elu, lidera ema na’in-22 halo estudu komparativu iha distritu TTS.

Notísia relevante: Delegasaun RAEOA vizita atendimentu suku ho sistema dijitalizasaun iha suku Tapenpah TTU

Jornalista       : Abílio Elo Nini
Editor               : Evaristo Soares Martins

iklan
iklan

Leave a Reply

iklan
error: Content is protected !!