Komunidade suku Beco preokupa ponte Lomea ameasadu atu kotu
COVALIMA, 10 novembru 2022 (TATOLI)–Komunidade preokupa ho kondisaun ponte Lomea iha aldeia Maukola, suku Beco, postu administrativu Suai ne’ebé liga ba suku Tashilin, postu administrativu Zumalai ameasadu atu kotu hodi difikulta movimentu transporte públiku ba no mai.
Komunidade suku Beco, Adão Moniz, hateten Ponte Lomea la’ós foin mak hetan estragu maibé sempre akontese kada tinan bainhira tempu udan monu rai tanba korrente bee-mota tun hodi estraga ponte refere.
“Ponte Lomea la’ós foin mak akontese atu kotu maibe sempre ameasadu atu kotu ne’e kada tinan bainhira udan monu rai. Durante ne’e autoridade relevante seidauk tau atensaun sériu hodi asegura no hadi’a ponte refere, tanba ne’e mak kada tinan sempre ameasa atu kotu,” Adão Moniz hato’o ba jornalista sira iha Ponte Lomea, suku Beco, kinta ne’e.
Xefe suku Beco, Arlindo Bernadino Lemos, rekuiñese ponte Lomea kada tinan iha tempu udan mota sempre estraga ponte ne’e, hodi difikulta komunidade atu lori produtu lokál ba faan iha merkadu postu administrativu Zumalai.
Líder komunitária ne’e mós husu ba Servisu Munisipal Obra Públika iha Covalima atu haree no hodi halo reabilitasaun ka normalizasaun ba Ponte Lomea ne’ebé ameasadu atu kotu ne’e.
Diretór Servisu Munisipál Obras Públika (SMOP) Covalima, Alberto Cardoso klarifika, Servisu Munisipál Obra Públika (SMOP) Covalima laiha ekipamentu pezadu atu normaliza ponte Lomea iha área suku Beco, postu administrativu Zumalai ne’ebé ameasadu atu kotu ne’e.
“Ita iha munisípiu rasik mós laiha ekipamentu pezadu, tan ne’e ita halerik nafatin ba ema boot sira. Ne’ebé ita-nia kna’ar mak ida-ne’e, ita husu ba sira bainhira mak sira hatutan fali ita-nia halerik ne’e ba iha IGE, I.P foin bele haruka ekipamentu pezadu ne’e mai, hodi normaliza fali ponte no estrada sira-ne’ebé mak hetan estragu hosi mudan-been,” nia informa.
Maske laiha ekipamentu pezadu maibé diretór mós haruka ona karta ba iha Ministériu Obra Públika (MOP) oinsá atu bele haruka ekipamentu pezadu hodi mai normaliza ponte refere, maibé se munisípiu iha ekipamentu la presiza hein ekipamentu hosi nasionál.
“Ami enkamiña ona karta ba iha Ministru Obra Públika, tanba tuir ha’u ba enkontru ho Administradór Munisípiu Covalima hodi haruka kedas karta ne’e ba tan. Ita hotu hein oinsá ema boot sira bele haruka fali ekipamentu pezadu sira-ne’e mai ita, nune’e normaliza fali ponte ne’e,” nia hateten.
Maibé ekipamentu pezadu iha nasionál mós laiha tanba ekipamentu pezadu ne’e konsentra hotu Vise MOP nia okos, tanba ne’e maske haruka ona karta ba diretór nasionál estrada sira no diretór jerál sira mós sei hato’o tutan tan fali ba prezidente IGE, I.P ne’e instituisaun ketak ida.
Jornalista : Celestina Teles
Editór : Cancio Ximenes
