iklan

EDUKASAUN, HEADLINE

MEJD no Embaixadór Nova Zelándia asina akordu kooperasaun programa eskola iha uma

MEJD no Embaixadór Nova Zelándia asina akordu kooperasaun programa eskola iha uma

Ministru Edukasaun Juventude no Desportu, Armindo Maia, no Embaixadór Nova Zelándia iha Timor-Leste, Philip Hewitt, asina nota koperasaun ba implementasaun programa eskola iha uma, iha salaun MEJD, Vila Verde, kinta (10/11). Imajen TATOLI/Egas Cristóvão

DILI, 10 novembru 2022 (TATOLI)—Governu Timor-Leste liuhosi Ministru Edukasaun Juventude no Desportu, Armindo Maia no Governu Nova Zelándia liuhosi ninia Embaixadór, Philip Hewiit, kinta ne’e, asina akordu kooperasaun ida  ho objetivu atu aselera programa ‘eskola iha uma.’

Ministru Armindo informa, programa ne’e sei implementa uluk iha munisípiu Dili, nune’e labarik sira hotu bele hetan asesu ba edukasaun pre-eskolár.

“Orsamentu balun ho millaun $1,6 ne’ebé prevee ba programa eskola iha uma ho intensaun atu fornese bens no servisu ba profesór no fasilidade eskolár, sosa materiál didátiku, no apoiu biblioteka movel, atu nune’e bele tulun labarik sira iha fatin dook hodi bele asesu ba fasilidade didátiku sira,” Ministru hateten hafoin asina akordu kooperasaun salaun enkontru MEJD, Vila Verde, kinta ne’e.

Antes ne’e, Governu prevee orsamentu millaun $2,3 resin iha Orsamentu Retifikativu tinan 2022 hodi implementa programa eskola iha uma.

Notísia relevante: MEJD prevee millaun $2,3 atu realiza programa eskola iha uma

Tuir governante ne’e, kooperasaun ho Nova Zelándia la’ós foin hahú maibé akontese ona entre tinan 2001/2002, ne’ebé nasaun parseiru ne’e sempre apoiu MEJD iha programa edukasaun pre-eskolár to’o ohin loron.

“Ohin ita marka tan etapa foun ida hodi reforsa tan ita-nia kooperasaun. Hanesan baibain, bainhira kooperasaun hahú, orsamentu atu apoiu programa sempre maihosi parseiru dezenvolvimentu sira, hanesan mós ho Governu Nova Zelándia, maibé ba momentu ida-ne’e ministériu mai ho orsamentu millaun $1,6,” nia akresenta.

Iha fatin hanesan, Embaixadór Nova Zelándia iha Timor-Leste, Philip Hewitt, konfesa katak Governu Nova Zelándia iha kompromisu hakarak apoiu Governu Timor-Leste ho intensaun atu aselera prosesu dezenvolvimentu ba labarik sira iha edukasaun pre-eskolár liuhosi programa halimar, apreende no deskobre susesu (HANDS).

“Ami haree oportunidade ne’e úniku tebes, tanba ne’e ami bele servisu hamutuk ho Ministériu Edukasaun Juventude no Desportu atu hasa’e kualidade edukasaun ba eskola sira iha Timor-Leste,” nia tenik.

Diplomata ne’e reforsa, Nova Zelándia hakarak atu lori edukasaun ba labarik sira iha pré-eskolár ne’e atu sai di’ak no kualidade liután.

“Espera katak kooperasaun di’ak entre parte rua ne’e bele ajuda malu hodi tau-matan ba labarik sira hodi hetan futuru di’ak liu,” nia subliña.

Programa eskola iha uma hanesan programa pilotajen, ne’ebé hahú implementa iha jullu tinan ne’e, ba labarik atu tama ba edukasaun pre-eskolár ho idade 3 to’o 5 no ensinu báziku hosi idade 6 to’o 7, iha primeiru ano ensinu báziku primeiru siklu, ne’ebé durante ne’e la asesu ba edukasaun formál, nune’e bele hetan formasaun liuhosi programa eskola iha uma.

Programa pilotajen eskola iha uma ne’e atu implementa iha munisípiu Dili iha postu administrativu hamutuk lima, suku 37 no aldeia 222.

Tuir informasaun katak programa nasionál ne’e sei realiza iha sede aldeia hamutuk 222 iha Dili.

Jornalista   : Tomé Amado

Editora         : Julia Chatarina

iklan
iklan

Leave a Reply

iklan
error: Content is protected !!