Munisípiu idak-idak sei organiza rasik jogu komunitária iha tinan oin
BOBONARO, 10 novembru 2022 (TATOLI) – Diretór Jerál Juventude no Desportu, David Tomás de Deus, fó-sai katak, tinan 2023 munisípiu idak-idak mak sei organiza atividade desportu komunitária tanba Sekretaria Estadu Juventude no Desportu (SEJD) sei transfere orsamentu ba konta bankária diresaun finansa munisipál iha territóriu nasionál.
Diretór Jerál SEJD hato’o asuntu ne’e iha atividade sosializa programa estímulu empreendedorizmu sosiál juventude suku, desportu komunitária no konstrusaun kampu komunitária ba autoridade munisípiu Bobonaro sira, kinta ne’e.
“Tinan oin orsamentu SEJD nian komesa tún, tanba munisipiu nian sa’e, ho lójika katak ami hasai hosi ami-nia indikadór ida, atribui fali ba kada munisipiu, ne’ebé tinan oin administradór sira informa ba xefe suku sira, ba ema hotu-hotu katak, tinan oin laiha ona proposta desportu komunitária ba SEJD,” nia ko’alia iha salaun administrasaun munisípiu Bobonaro.
David haktuir, iha tinan kotuk sentru joventude sira mak organiza programa ne’e inklui orsamentu, maibé la konsege ezekuta ho susesu nune’e orsamentu fila ba kaixa estadu boot liu kompara ho ezekusaun maske nesesidade povu nian sei barak hela.
“Ida-ne’e tanba sentru juventude nia rekursu mak la sufisiente, depois Governu transporta tún ba to’o área rurál iha suku sira la to’o, entaun osan liuhosi metade mak tama fali ba kofre estadu,” nia fó-sai.
Enkuantu objetivu SEJD promove fali desportu komunitária tanba atu hametin koezaun, relasaun ema ho ema iha komunidade, fatin ba ema atu idak-idak partisipa ativamente iha sira-nia suku no aldeia.
Nune’e mós desportu komunitária fatin ba atu deskobre talentu povu nia oan sira iha suku, aldeia sira hodi hetan sira-nia talentu.
“Ida-ne’e atubele fó resposta ba preokupasaun públiku, tanba saida maka kada loron iha aeroportu Dili, joven sai ba rai-li’ur tanba ami laiha kampu serbisu, entaun oportunidade maka ida-ne’e,” nia katak.
Notísia relevante: Jogu Komunitária iha Maliana sei hahú iha 08 dezembru
Jornalista : Sérgio da Cruz
Editór : Evaristo Soares Martins
