BAUCAU, 10 novembru 2022 (TATOLI) – Ezekusaun Orsamentu Jerál Estadu (OJE) tinan fiskál 2022 iha Administrasaun Munisipál Baucau atinje ona 77.5% ($3,517,154,6) hosi totál orsamentu $4,538,264.
Prezidente Autoridade Munisipál (PAM) Baucau, Olivio ‘Bou-Lesa’ Freitas, esplika, ezkusaun refere hosi totál orsamentu ne’ebé prevista ba kompromisu sira hamutuk $11,321.50, obrigasaun $199,660.00, atuál $4,219,440.43 no saldu hela $1,274,348.91.
“Atu selu ema-nia retensaun (projetu PDIM) hamutuk pursentu 10 iha hotu ona konsesu laran, karik semana oin halo ona pagamentu entaun ami bele atinje liu pursentu 80 ka 90,” Prezidente Autoridade Munisipál Baucau, Olívio ‘Bou-Lesa’ Freitas hateten iha Vila Nova, kinta ne’e.
Munisípiu Baucau aloka orsamentu tuir liña orsamentu serbisu setoriál no sekretariadu munisipál nian ne’ebé akumuladu ona kustu ba merenda eskolár, alfabetizasaun, konsesaun eskolár tokon $1.6 no ba projetu reapropriasaun Planu Dezenvolvementu Integradu Munisipál (PDIM) rihun $392.9.
Bou-Lesa garante bele ezekuta orsamentu jerál estadu 2022 liu pursentu 90 hafoin halo pagamentu finál ba projeitu PDIM hamutuk projetu hitu hanesan konstrusaun sede suku neen inklui konstrusaun moru haleu iha merkadu Tuanau ho totál orsamentu hamutuk rihun $392.9.
Totál orsamentu ne’ebé iha, munisípiu Baucau aloka ba rúblika sira hanesan saláriu no vensimentu hamutuk $1,654,506.00, bens no servisu rihun $834.630, transferénsia públika tokon $2,009,080.00, kapitál menór rihun $40.000 no kapitál dezenvolvimentu rihun $392.908.
Notísia relevante: OJE 2022: PN aprova orsamentu ba munisípiu sira iha espesialidade
Jornalista : Natalino Belo
Editór : Evaristo Soares Martins
