DILI,10 novembru 2022 (TATOLI)—Diretór Servisu Saúde Munisípiu (SSM) Ainaro, Agostinho da Costa, informa munisípiu Ainaro, hala’o ona sosializasaun ba komunidade atu hala’o limpeja jeral hodi prevene surtu dengue.
“Daudaun ne’e, ami hala’o sosializasaun ba komunidade hodi prepara prevene surtu dengue iha munisipiu Ainaro, maske tempu udan ona, maibé mai seidauk rejista kazu dengue”, Diretór ne’e hateten ba TATOLI via telefónika, kinta ne’e.
Nune’e, nia dehan submete ona pedidu ba MS atu apoia fundu ruma hodi hala’o sosializasaun prevensaun surtu denque ba komunidade sira iha munisipiu refere.
“Kona ba ai-moruk abate no fumigasaun iha Servisu Saúde Munisípiu Ainaro sufisiente atu atende kazu dengue bainhira mosu”, katak.
Entretantu, Diretór Nasionál Saúde Publika iha Ministériu Saúde, Frederico Bosco, husu ba familia hotu atu proteje an liuhusi pratika medida preventiva hanesan fase tanke, bidon, no troka bee kada semana ida dala ida, uza replente liuliu kose ba labarik kiik sira no inan isin rua nia isin no mantein limpeja iha bairru risku sira hodi prevene aan hosi dengue.
Jornalista : Felicidade Ximenes
Editór : Florencio Miranda Ximenes
