iklan

HEADLINE, MUNISÍPIU, VIQUEQUE

Grupu tolu benefisia programa istimulu emprendorizmu sosiál la ativu

Grupu tolu benefisia programa istimulu emprendorizmu sosiál la ativu

Diretór Sentru Juventude munisípiu Viqueque, Janauário Benivides de Araújo. Imajen Tatoli/Vitorino Lopes da Costa

VIQUEQUE, 11 novembru 2022 (TATOLI)—Sentru Juventude munisípiu Viqueque apoia ona fundu ba grupu 28 liuhosi programa istimulu emprendorizmu sosiál, maibé grupu tolu la ativu ona.

“Programa estimulu emprendorizmu sosiál hetan apoia orsamentu hosi Sekretaria Estadu Juventude no Desportu (SEJD) ba Sentru Juventude munisípiu Viqueque, nune’e ami apoia fali joven sira ne’ebé forma grupu hamutuk 28 hodi realiza atividade hanesan ortikultura no pekuária, maibé foin lalais ami haree iha grupu tolu mate. Grupu 25  maka daudaun sei kontinua la’o sira-nia atividade,” Diretór Sentru Juventude munisípiu Viqueque, Janauário Benivides de Araújo, hateten ba Agência Tatoli, iha Sentru Juventude, sesta ne’e.

Programa ne’e destina ba joven kreativu sira hodi bele hetan oportunidade hamriik mesak hodi sustenta ba família.

“Sentru Juventude akompaña hosi grupu 25 ne’e, balun kuda pateka, kuda modo no grupu balun hakiak manu,” nia akresenta.

Notísia relevante: Sentru Juventude Viqueque apoia fundu estímulu empreendedorizmu ba benefisiáriu 29

Aleinde ne’e, sentru ne’e identifika grupu tolu ne’ebé mate iha postu Viqueque Vila tanba mosu problema iha grupu laran no ikus mai membru  grupu sira fahe malu no atividade paradu.

“Sentru Juventude Viqueque kontinua enkoraja grupu sira ne’ebé sei la’o. Kona-ba apoiu fundu foin lalais ami fó apoia dahuluk kada grupu hetan fundu $7.500. Ami sei kontinua apoia grupu sira atu hadi’a produsaun, buka dalan ba grupu lori produtu asesu ba merkadu no sentru juventude mós sei kontinua fó formasaun ba grupu sira hodi sira bele halo jestaun ba grupu hodi nafatin hakat ba oin,” nia tenik.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!