iklan

DILI, POLÍTIKA

OJE 2023 hosi Prezidénsia Repúblika aprovadu iha espesialidade

OJE 2023 hosi Prezidénsia Repúblika aprovadu iha espesialidade

Membru Governu no Membru Parlamentu Nasionál halo debate espesialidade proposta OJE tinan 2023, iha sala plenáriu PN, kuarta (09/11). Imajen TATOLI/Francisco Sony.

DILI, 11 novembru 2022 (TATOLI)—Deputadu sira iha Parlamentu Nasionál aprova proposta-lei Orsamentu Jerál Estadu (OJE) ba tinan fiskál 2023 hosi Prezidénsia Repúblika iha espesialidade ho votu a-favór 61, kontra 0 no abstensaun ida.

“Nune’e Prezidénsia Repúblika nia orsamentu ba tinan oin aprovadu iha espesialidade,”  Prezidente Parlamentu Nasionál, Aniceto Longuinhos Guterres Lopes, hateten iha debate proposta lei OJE 2023 iha faze espesialidade ba loron daruak iha PN, sesta ne’e.

Iha debate proposta-lei OJE ba Prezidénsia Repúblika ne’e deputadu sira aprezenta proposta tolu husu atu hasai osan hosi prezidénsia.

“Agora ita ba iha tabela V-Despeza sub-setór administrasaun sentrál, por klasifikasaun órganika no estruturada por programa hahú uluk hosi Prezidénsia Repúblika iha proposta tolu,” Aniceto Guterres dehan.

Proposta dahuluk hanesan iha tabel V, despeza sub-setór administrasaun sentrál, klasifikasaun órganika no estrutura por programa iha títulu 001 Prezidénsia Repúblika programa  kódiku 510 boa-governasaun no jestaun instituisionál ho dotasaun inisiál $7,658,859 alterasaun hasai $1,000,000 dotasaun finál $6,658,859

Tau ba iha títulu 314 fundu dezenvolvimentu kapitál umanu programa bolsa estudu dotasaun inisiál $12,382,218 alterasaun aumenta $1,000,000 dotasaun finál $13,382,218.

Justifikasaun sumária deputadu proponente Fretilin, Helena Martins Belo, Maria Angelica Rangel ho Antoninho Bianco, ne’ebé  propoin prezenta proposta alterasaun redusaun orsamentu ho montante $1,000,000  hodi tau fali ba iha fundu dezenvolvimentu kapitál umanu hodi hala’o atividade Kuba medisina espesialista.

“Ami halo proposta ida hodi  ne’e tau atensaun ba ita-nia ema tanba ita-nia ema mak fundamentu ba dezenvolviemntu, nune’e presiza haree kondisaun vida liliu saúde nian, Timor-Leste tinan-tinan haruka pasiente ba rai-li’ur, públiku preokupa entaun dalan di’akliu fó duni kapasitasaun médiku espesialista hanesan iha primeiru Governu ita kapasita ona médiku rihun 1000-resin entaun agora reforsa tan. Ami la hasai osan hosi tetu maibé ami hasai hosi prezidénsia montante ne’ebé ami hanoin la ezekuta hotu iha tinan oin no previzaun atu haruka médiku 43,”  Deputada Helena Martins fundamenta.

Nune’e, husu deputadu sira atu fó a-favór ba proposta ne’ebé propoin.

Proposta daruak hosi proponente deputada Fretilin, Josefa Soares, husu hasai $69.985 hosi dotasaun inisiál $1,009,378 iha programa kódiku A01 promove indentidade nasionál, razaun husu ne’e tanba montante osan ne’e atu aloka akompañamentu prezidénsia nian ba eleisaun ne’ebé akontese iha 2022.

Proposta datoluk hosi deputada Fretilin Josefa Soares, Irene Gonzaga Sarmento (Khunto), Bernando Quintão (PLP) husu hasai $490.200 hosi dotasaun inisiál $1.820.000 iha programa kódiku A03 dezenvolvimentu inkluzivu no sustentável hodi tau fali ba  títulu 018 Ministéiru Edukasaun Juventude no Desportu (MEJD) iha programa kódiku 510 boa-governasaun no jestaun instituisionál.

Proposta ne’e, ho sub-programa jestaun instituisionál ho atividade subsídiu extaordináriu profesór ka manorin na’in kontratadu 2023, ho justifikasaun proponente sira baze informasaun rekolla durante fiskalizasaun komisaun G (trata asuntu edukasaun) verfika prosefór kontratadu sofre ladun hetan protesaun sosiál ho falta hosi MEJD ho (ho exemplu protesaun iha reforma) númeru profesor kontratadu 1478 sei refroma iha tinan oin, ho ida nesesáriu funsionamentu eskola, subsídiu ne’e ho objetivu atu kompensa profisional sira-ne’e.

Deputadu Josefa, defende katak proposta rua hanesan liga ba revee estatutu prosefór kontratadu iha rua hanesan efeitu no idade reforma, ba idade reforma mai ho hanoin sira atu reintegra presiza atu reforma.

Tanba bazea mós fiskalizasaun deputadu sira profesor idade refoma husu oinsá sira deskansa ona, no iha lei grande opsaun planu GOP, mai revee atu estatutu profesór kontratadu maibé sira idade reforma oina atu despede sira.

“Nune’e ami hanoin proposta ne’e husu montante la boot atu hasai hosi prezidénsia nian atu haree profesór atu bele deskansa,” nia hateten.

Hatán proposta tolu ne’e, Primeiru-Ministru (PM), Taur Matan Ruak, agradese ba proposta deputadu sira-nian maibé Governu hanoin Prezidensia Republika nia orsamentu labele hasai.

“Iha razaun rua tanba ida-ne’e primeiru osan dahuluk ba prezidénsia no segundu tinan oin Parlamentu Nasionál ho Governu nia mandatu atu hotu no uniku Prezidénsia Repúblika mesak, lae nia tenke tau matan liuliu ba estabilidade,” Xefe Governu esplika.

Nune’e, Governu nia hanoin labele koa no naturalmente ba instituisaun rua hanesan órgaun soberania Prezidénsia Repúblika ho Parlamentu Nasionál desde uluk labele book ka labele koa.

PM dehan, kona-ba nesesidade ne’ebé deputadu sira hato’o sei iha ezersísiu seluk bele halo iha ministéiru relevante hodi haree no tanba Governu nia mandatu setembru tinan ne’e hotu karik Governu foun mai orsamentu ratifikativu nia bele book.

“Governu komprometidu ba proposta sira iha saúde no edukasaun ajustamentu hodi kontenpla,” PM hateten.

Hafoin ne’e deputadu sira iha plenária maiória hato’o observasaun katak proposta sira-ne’e pertinente maibé labele koa osan prezidénsia, tanba Prezidénsia Repúblika hanesan órgaun soberania dahuluk hodi bele implementa nia programa ne’ebé trasa ona ba tinan oin maibé bele halo ezersísiu hasai hosi liña ministériu sira seluk.

Nune’e proponente sira deside retira hotu proposta sira maibé nafatin husu Governu atu konsidera haree.

Enkuantu, Deputadu sira mós aprova proposta-lei Orsamentu Jerál Estadu (OJE) ba tinan fiskál 2023 hosi Prezidénsia Repúblika ho votu a-favór 61, kontra 0 no abstensaun ida (1), nune’e aprovadu.

Enkuantu Prezidénsia Repúblika iha proposta OJE 2023 prevee ho montante $12,088,413 hodi prioritiza programa prioridade lima.

Tuir livru anexu XI planu anuál ba serbisu no entidade setór públiku administrativu, Prezidénsia Repúblika prevee programa prioridade lima mak hanesan; dahuluk, programa Estadu direitu prevee $238, 987 ho nia sub-programa koezaun no prestíjiu defeza seguransa ho nia atividade ida, sub-programa promosaun direitu umanu nia atividade nomeasaun kandidatu ba atribuisaun prémiu Sergio Vierra de Mello.

Daruak, programa boa-governasaun jestaun instituisionál tau $7,658,859 ho nia sub-programa boa-governasaun ho atividade rua, sub-programa jestaun instituisionál nia atividade neen.

Datoluk, programa promove identidade nasionál prevee $1,009,378, ho nia sub-programa apoiu promosaun língua portugés no tetún ba língua fortalesimentu koezaun povu Timor-Leste ho atividade dokumentasaun no publisidade, sub-programa fortalese valór rezisténsia no valorizasaun patrimóniu kulturál povu TL ho nia atividade eventu serimoniál, promove arte no kultura, valoriza sidadaun nia kontribuisaun, sub-programa promove kultura no seguransa nasionál iha sosiedade timorense ho atividade sensibilizasaun, palestra, serimónia kona-ba asuntu defeza no seguransa.

Dahaat mak, programa reforsa relasaun no kooperasaun internasionál prevee $1,361,189 ho sub-programa vizita nasaun multilaterál nia  atividade mak halo  vizita internasionál ba nasaun sira reforsa relasaun estratéjika, vizita kortezia Xefe Estadu, vizita internasionál reforsa relasaun estratéjika diplomásia defeza.

Purtantu, dalimak mak programa dezenvolvimentu inkluzivu no sustentável prevee $1,820,000,  ho sub-programa diálogu komunitária ho atividade vizita ofisiál Xefe Estadu nivél nasionál, sub-programa promosaun apoiu dezenvolvimentu ekonómiku sustentável ho atividade enkontru, semináriu no konferénsia, sub-programa desiminasaun informasaun kona-ba prevensaun kontra  cancro  mamária, cérvica ás nutrição mulher e comunidade ho atividade desportu inisiativa PR.

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!