iklan

HEADLINE, MUNISÍPIU, VIQUEQUE

Amu pároku Uatucarbau enkoraja joven luta ba moris di’ak

Amu pároku Uatucarbau enkoraja joven luta ba moris di’ak

Komunidade Uatucarbau lori ai-funan no lilin ne’ebé hetan ona bensa hafoin misa iha Igreja Nossa Senhora do Rosário de Fátima, Uatucarbau, hodi tau iha iha semitériu públiku iha suku Uani Uma, postu administrativu Uatucarbau, sábadu (12/11). Imajen Tatoli/Vitorino Lopes da Costa

VIQUEQUE, 12 novembru 2022 (TATOLI)—Amu pároku Uatucarbau, João Tamonob, konsidera Masakre Santa Crúz hanesan reflesaun ida, tanba ne’e husu ba joven sira atu luta ba moris di’ak.

Selebrasaun misa loron nasionál juventude ba da-17 no Masakre Santa Crúz ba da-31, iha Igreja Nossa Senhora do Rosário de Fátima, Uatucarbau, munisípiu Viqueque, sábadu (12/11). Imajen Tatoli/Vitorino Lopes da Costa

“Reflesaun badak ba komemorasaun loron 12 novembru 1991, ha’u husu ba joven tomak inklui joven iha postu Uatucarbau tenke sai hanesan joven rezisténsia ne’ebé uluk luta ba libertasaun rai Timor-Leste. Aban bainrua joven sira tenke hanoin luta ba moris di’ak,” Amu pároku Uatucarbau, hateten liuhosi nia omília ba selebrasaun loron nasionál juventude ba da-17 no Masakre Santa Crúz ba da-31, iha Igreja Nossa Senhora do Rosário de Fátima, Uatucarbau, munisípiu Viqueque, sábadu ne’e.

Joven rezisténsia sira ne’ebé pasa iha tempu difísil konsege hakat liu, nune’e agora balun bele hamriik hamutuk ho joven sira agora iha loron istóriku hodi selebra loron 12 novembru 1991.

“Ohin ita bele haree filafali saida maka juventude asu’wain sira halo, joven sira luta hodi defende ema-nia direitu no lia loos. Ho lema ‘se la’ós ita se tan no la’ós ohin banhira tan’, ho espíritu ida-ne’e joven sira kaer liman la husu tan bainhira, maibé joven sira dehan ohin kedan. Joven sira konsiente katak sira maka sai liña frente hodi realiza luta joven sira, ne’ebé hatene katak sei hasoru kroat, torturasaun, kastigu to’o balun mate, maibé joven sira luta nafatin hodi hetan ukun rasik-an ba rai no povu Timor tomak,” nia akresenta.

Notísia relevante: Jerasaun foun prontu sai funu na’in ba dezenvolvimentu

Nia dehan, loron 12 novembru sai masakre negro ba juventude sira tanba iha loron ida-ne’e joven sira lakon vida no sai istória ba Timor no ba mundu.

Aleinde ne’e, Amu husu jornalista sira tenke kontinua luta jornalista, Max Stahl, hodi habelar informasaun sira.

“Selebrasaun loron ida-ne’e hodi ita valoriza akontesimentu 12 novembru nu’udar momentu importante tebes. Ita haree movimentu ne’ebé mai hosi juventude ohin loron oinsá. Juventude agora ninia obrigasaun loloos mak saida iha ambiente independénsia?, tanba juventude uluk hakarak kontra kolonializmu. Juventude agora presiza estuda, no partisipa iha dezenvolvimentu iha nasaun independénsia. Ida-ne’e mak juventude ne’ebé hatene agradese ba partisipasaun juventude luta rezisténsia ne’ebé marka istória iha loron 12 novembru,” nia subliña.

Padre ne’e konsidera joven agora fasil tama lasu no lakon espíritu atu kritika lala’ok polítika ne’ebé la’o de’it iha fatin. Joven agora barak maka lakon direitu hodi mete liu rede sosiál no la hanoin saida maka di’ak liu atu halo ba nasaun independénsia ida-ne’e.

“Ita iha joven barak, maibé la organiza-an. Tempu uluk joven sira iha kbiit hodi organiza-an, maibé agora oinsá bele organiza-an iha bairru, suku postu, no munisípiu, Bainhira ita seidauk to’o nasionál, ita hahú uluk iha baze hodi partisipa iha aspeitu hotu,” nia tenik.

Durante misa selebrasaun loron istóriku iha postu administrativu Uatucarbau, komunidade lori ai-funan no lilin hodi hetan bensa hosi Amu no hafoin misa ramata kontinua la’o hodi kari ai-funan iha semitériu públiku iha suku Uani Uma, postu administrativu Uatucarbau.

Sobrevivente Masakre Santa Crúz hola parte

Reprezentante sobrevivente Masakre Santa Crúz hosi postu administrativu Uatucarbau, Lorenço da Silva, konsidera, selebrasaun loron istóriku ne’e hodi hanoin ikas maluk sira ne’ebé lakon vida ba luta libertasaun Timor Leste.

Komunidade no Autoridade lokál kari ai-funan no sunu lilin iha semitériu públiku iha suku Uani Uma, postu administrativu Uatucarbau, iha ámbitu selebrasaun loron nasionál juventude ba da-17 no Masakre Santa Crúz ba da-31, sábadu (12/11). Imajen Tatoli/Vitorino Lopes da Costa

“Ha’u orgullu reprezenta juventude uluk, tanba aban bain-rua joven sira agora maka lori ba oin,” Lorenço da Silva, hateten, hafoin ramata kari ai-funan, iha semitériu públiku, iha suku Uani Uma, postu Uatucarbau.

Nia haktuir, joven rezisténsia uluk prepara fíziku no mentalidade hodi luta ba libertasaun.

“Ita-nia maluk joven hosi Uatucarbau ho naran Chico Binaraga, iha momentu ne’ebá prepara-an atu ba tuir kompetisaun hit besi iha Japaun, maibé ema oho nia iha momentu ne’ebá. Ho ida-ne’e alin joven sira tenke hanoin buat sira ne’e,” nia haktuir.

Iha sorin seluk, nia husu ba joven sira ne’ebé partisipa treinu arte-marsiál sira hodi prepara fíziku no mentalidade hodi halo dezenvolvimentu maibé mós tenke iha responsabilidade.

“Joven uluk luta to’o balun lakon vida no balun agora kaer ukun, nune’e joven agora tenke prepara fíziku, mentalidade no matenek hodi aban bain-rua bele kaer nasaun no halo dezenvolvimentu,” nia enkoraja.

Iha fatin hanesan, Administradór postu Uatucarbau, Alfredo dos Santos, dehan, selebrasaun ne’e hodi fó onra ba eroi sira ne’ebé lakon vida.

“Ohin ita hamutuk hodi fó onra ba eroi sira ne’ebé halo ona sakrifísiu ba rai Timor. Nune’e mós ba ita-nia joven jerasaun foun sira nafatin humutuk hodi fó viva ba eroi no fó onra ba sira,” nia akresneta.

Biban ne’e, nia husu ba joven Uatucarbau ne’ebé envolve iha arte-marsiál sira iha loron boot, tenke kontribui ba pás no establidade.

Nune’e mós, Komandante Eskuadra PNTL postu Uatucarbau, Jacob Amaral, hateten, presiza banati tuir lala’ok asu’wain sira no iha ukun rasik-an hamutuk kria pas no establidade hodi alkansa prosesu dezenvolvimentu.

“Ita hamutuk hodi kria unidade, amizade no pás hodi alkasa dezenvolvimentu iha territóriu nasionál inkliu iha postu Uatucarbau,” nia salienta.

Atividade ne’e partisipa hosi komunidade no autoridade lokál, Polísia Nasionál Timor-Leste (PNTL) Eskuadra Uatucarbau no arte-marsiál sira hanesan Ikatan Kera Sakti (IKS), Persaudaraan Setia Hati Terate (PSHT), KORK no seluk tan.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!