iklan

JUSTISA, HEADLINE

Família lamenta desizaun Tribunál halo eviksaun uma iha Bedois

Família lamenta desizaun Tribunál halo eviksaun uma iha Bedois

Autoridade seguransa no guarda munisipál hasai ona sasán hosi uma iha área Bedois, bazeia ba mandadu Tribunál, sábadu (12/11). Imajen/Espesiál

DILI, 12 novembru 2022 (TATOLI)—Reprezentante família, Abrão do Rego, lamenta ho desizaun Tribunál, ne’ebé halo evikasaun uma hasoru nia família hodi haruka sai hosi hela fatin.

“Ha’u la satisfaz liu ho evikasaun mai hosi desizaun Tribunál, ne’ebé haruka ami sai hosi fatin ne’e, tanba antes ne’e ami la hetan notifikasaun ida hosi Tribunál no buat hotu horiseik to’o mai ne’e derrepente,” Abrão do Rego, hateten iha Bedois, sábadu ne’e.

Bazeia ba desizaun Tribunál Distritál Dili (TDD), autoridade seguransa no guarda munisipál ezekuta mandadu iha sesta (11/11) tuku 09:00 dadeer, hodi halo eviksaun uma ne’ebé família Abrão do Rego okupa iha área Bedois, suku Camea, postu administrativu Cristo Rei, munisípiu Dili, ne’ebé hasai sasán hotu hosi uma-laran no tau police line hodi proibe família okupante tama uma.

Tanba ne’e, parte família husu ba Ministériu Justisa no Deputadu sira iha Parlamentu atu esplika lei rai loloos ba povu kiik sira hodi bele kompreende.

“Pelumenus hatudu ba ami desizaun maka ida-ne’e hodi ami bele satisfaz, nune’e labele hanesan horiseik, buat hotu liga ba desizaun de’it no mai halo evikasaun derrepente hodi  haruka ami sai,” nia akresenta.

Notísia relevante: Prezidenti Republika Promulga Ona Lei Rai

Nia dehan, daudaun ne’e nia ho família toba de’it  iha li’ur tanba Polísia bobar ona police line ba uma ne’ebé sira hela.

“Ami agora laiha hela fatin provizóriu, ami horikalan toba iha rai ne’e. Ha’u-nia oan kiik-oan deit no ha’u nia oan ida foin mak moris loron-tolu, tanba Polísia dada ona sira-nia tali, ne’ebé ami labele asesu ba uma laran,” Abrão do Rego, haktuir.

Uma no rai ne’e rasik, Abrão do Rego ho nia família okupa desde tinan 1985 (okupasaun Indonézia), maibé iha tinan 2016, propriedade imóvel ne’e iha disputa nia laran entre okupante no Alexandre dos Santos, to’o lori kazu ne’e ba Tribunál hodi hetan legalidade estuatutu.

Nune’e, iha tinan 2021, Tribunál hasai notifikasaun ida hodi husu ba família, Abrão do Rego, atu koopera ho parte justisa hodi solusiona problema maibé momentu ne’ebá família okupante uma Bedois la kumpre.

TDD iha tinan 2022 kontinua hasai notifikasaun hodi notifika tan família okupante no husu atu kolabora ho parte justisa ba disputa kazu rai ne’e rasik, maibé kontinua la kumpre notifikasaun.

Abrão do Rego rekoñese, simu notifikasaun iha tinan 2021 hosi Tribunál hodi sira bele kolabora ho parte justisa, maibé tinan 2022 seidauk hetan fali notifikasaun.

“Horiseik sira (Tribunál) aprezenta mai ami katak notifkasaun ne’e sira fó ba imi-nia defeza, nune’e ami kontaktu ami-nia Defeza hodi husu sobre ida-ne’e, maibé Defeza rejeita simu notifikasaun ruma hosi Tribunál,” nia konta tuir.

Abrão do Rego esplika tan, rai no uma iha Bedois ne’e uluk RT Beremau entrega ba nia Ama, Veronica Xavier Barreto iha tinan 1981 iha tempu Indonézia, tanba haree hannesan feto faluk ne’ebé nia kaben, Paulo Mesquita, lakon vida iha funu libertasaun nasionál. Hanesan feto faluk  sai benefisiáriu ba uma Rumah Sangat Sederhana (RSS) hosi Governu Indonézia liuhosi Ministeéiu Solidaridade iha momentu ne’ebá.

Nune’e, atu sai benefisiáriu ba uma, rekezitu iha tempu ne’ebá maka tenke iha rai rasik, entaun RT Beremau atribui rai metru 100 ba Veronica Xavier Barreto no iha tinan 1985 Governu Indonézia atribui uma hodi nia ho família hela to’o ohin loron.

Tuir observasaun jornalista Agência Tatoli iha terrenu, nota katak parte asosiasaun eis- Parlametu Foin-sa’e apoia ona lona tolu ba família Abrão do Rego atu uza hodi deskasa kalan nian.

Iha sorin seluk, jornalista tenta konfirma ba parte Alexadre dos Santos via telefónika, maibé nia parte rejeita fó komentáriu kona-ba problema disputa rai hasoru familía Abrão do Rego.

“Ha’u hanoin buat hotu ne’e deizaun Tribunál nian,  ne’ebé ita-boot bele bá konfirma direita ba Tribunál,” nia dehan.

Jornalista   : Natalino Costa 

Editora        : Julia Chatarina

iklan
iklan

Leave a Reply

iklan
error: Content is protected !!