iklan

COVALIMA, HEADLINE, MUNISÍPIU

Pároku Suai husu joven Suai kria unidade no pás

Pároku Suai husu joven Suai kria unidade no pás

Padre Pároku Igreja Ave maria Suai, Sebastião Eugênio da Cruz Correia, tau ai-funan iha Monumentu Masakre Setembru Negro 1999 hafoin prezide misa selebrasaun loron nasionál juventude ba da-17 no Masakre Santa Crúz ba da-31, iha Igreja Ave Maria Covalima, sábadu (12/11). Imajen Tatoli/Celestina Teles

COVALIMA  12  novembru   2022 (TATOLI)–Pároku Igreja Ave maria Suai, Pe. Sebastião Eugênio da Cruz Correia, husu ba joven sira atu kria unidade no pás.

“Joven loriku asu’wain sira see hirus matan, ohin-loron ita simu independénsia. Tanba ne’e, ita tenke brani hasai beik no kiak, harii rai ida-ne’e ho pás, armonia no luta, atu kontribui rai ne’e ita tenke sai ida-de’it,” Padre Sebastião, halaken liuhosi nia omília bainhira prezide misa agradesimentu iha ámbitu selebrasaun loron nasionál juventude ba da-17 no Masakre Santa Crúz ba da-31, iha Igreja Ave Maria Covalima, sábadu ne’e.

Nia dehan, joven sira tenke sai ida de’it hodi kria pás, dezenvolve rai no bainhira envolve iha grupu ida tenke ho konsiénsia.

“Ho nune’e, joven no estudante sira tenke kuidadu-an tanba futuru nasaun iha joven nia liman, labele hanoin atu sobu malu maski kria grupu arte marsiál oin-oin no labele depende ba grupu. Importante mak kria unidade hodi dezenvolve rai liuhosi  estuda. Atu dezenvolve rai-ida ne’e, la’ós grupu arte-marsiál mak lori imi atu sai membru Governu, maibé tenke liuhosi estuda,” nia akresenta.

Notísia relevante: Masakre 12 Novembru, feto sira terus liu mane

Iha sorin seluk, Amu ne’e sente triste bainhira grupu sira hahú tuda malu no oho malu,  enkuantu loriku asu’wain sira-nia luta atu joven ohin loron bele halo dezenvolvimentu.

“Ha’u sente triste ho hahalok joven sira, ne’ebé tuda malu no oho malu, tanba ne’e profesór sira tenke hanorin estudante sira ho didi’ak atu estudante sira labele estraga futuru, ba Dili atu estuda la’ós envolve iha grupu no buka malu hodi oho malu. Joven loriku asu’wain sira-nia luta atu ita moris di’ak hodi halo dezenvolvimentu harii país,” nia fó hanoin.

Hafoin misa, joven no estudante hosi eskola sekundáriu Ave Maria Suai lori ai-funan hodi la’o ain, hahú iha igreja Ave Maria suai, tau ai-funan no sunu lilin iha Monumentu Masakre Setembru Negro 1999.

Selebrasaun loron nasionál 12 novembru organiza hosi Sentru Joventude Covalima.

Autoridade Covalima la partisipa

Iha sorin seluk,  Padre pároku Igreja Ave maria Suai, sente triste tanba Autoridade Covalima sira la partisipa tau ai-funan iha Monumentu Masakre Setembru Negro 1999.

“Ohin, ita la haree Autoridade munisípiu. Ha’u triste tanba ita la valoriza joven loriku asu’wain, tanba sira-nia mate mak ita-nia moris. Tuir loloos, atu valoriza loriku asu’wain nia mate la presiza atu forma komisaun, maibé ida-idak tenke iha konsiénsia hodi valoriza joventude loriku aswain sira-nia mate, tanba ho sira-nia mate mak ohin loron hetan independénsia,” nia tenik.

Aliende ne’e, joven sira mós ladún partisipa iha selebrasaun loron istóriku tinan ne’e iha covalima.

“Sira ladún partisipa másimu tanba karik proukupa ho atividade seluk,  keta sira haluha ona karik ka la hatene ona loron 12 novembru karik, ou menus informasaun, maibé maski ho ema oitoan maibé selebra duni ho estudantu no joven balun. Ha’u hanoin ita presiza hanoin nafatin loron istóriku ne’e, tanba sira halo selebrasaun tenke hetan orsamentu, bainhira laiha orsamentu maka laiha selebrasaun. Maski orsamentu iha ka laiha, ita tenke halo, la’ós festa maibe ho inisiativa, la presiza iha orsamentu mak ita organiza,” nia dehan.

Nune’e mós, Prezidente Komisaun organizadora, Elizio Gusmão , hateten, parte komisaun halo ona preparasaun di’ak maibé la hetan partisipasaun másimu.

“Ha’u sente triste tanba ami komisaun halo prepasaun másimu hodi distribui konvite ba Autoridade Covalima maibé la partisipa,“ nia salienta.

Iha ámbitu selebrasaun loron istóriku ne’e, komisaun organizadora realiza atividade hanesan semináriu, kalan reflesaun, limpeza jerál no tau ai-funan iha Monumentu Masakre Setembru Negro 1999.

Jornalista   : Celestina Teles

Editora       : Julia Chatarina

iklan
iklan

Leave a Reply

iklan
error: Content is protected !!