iklan

MUNISÍPIU, VIQUEQUE

MOP Viqueque identifika estrada urbana besik kilómetru 40 seidauk reabilita

MOP Viqueque identifika estrada urbana besik kilómetru 40 seidauk reabilita

Kondisaun estrada dirasaun Suku Waibobo ba Nahareka, Postu Administrativu Ossu, Munisípiu Viqueque. Imajen TATOLI/Cipriano Colo

VIQUEQUE, 13 novembru 2022 (TATOLI) – Diretór servisu Ministériu Obras Públika (MOP) munisípiu Viqueque, Mario do Rego, informa servisu MOP identifika ona estrada urbana iha munisípiu Viqueque kuaze  kilometru 40 maka seidauk halo reabilitasaun.

“Ami identfika ona estrada urbana hanesan estrada liga postu vila laran, ne’ebé iha postu lima, iha munisípiu Viqueque kuaze purvolta kilometru 40 to’o oras-ne’e, ita seidauk halo reabilitasaun ruma”, Mario do Rego, hateten ba jornalista Agência Tatoli, iha postu Viqueque villa, domingu ne’e.

Mario hatutan estrada urbana ne’ebé identifika maka hanesan iha postu Lacluta villa, Ossu villa, Uatulari Villa, Uatulari Villa no Viqueque villa, maibé parte postu Viqueque villa reabilita ona kilometru 10, estrada sira seluk ne’e seidauk halo reabilitasaun.

“Ida-ne’e ba estrada urbana seidauk halo reabilitasaun tanba liga mós ba ita-nia orsamentu hotu. Tanba ne’e maka estrada urbana to’o agora ita seidauk halo reabilitasaun”, nia haktuir.

Aleinde ne’e, nia dehan, serbisu MOP Viqueque sei kontinua esforsu hodi atualiza estrada urbana inklui mós emerjénsia, ezemplu estrada kotu, ponte kotu, MOP Viqueque sempre akompaña no hato’o Ministériu Obras Públika nasionál, tanba desizaun hotu iha nasionál maka deside hodi aloka orsamentu.

“Ami serbisu munisípiu kontinua esforsu hodi atualiza estrada urbana sira-ne’e no mós emerjénsia, ami sempre hato’o iha nasionál. Tanba nasionál maka bele deside hodi reabilita ba estrada urbana tantu emerjénsia sira-ne’ebé mosu ami halo identifikasaun, depois informa ba ba ministériu hodi halo aloka orsamentu”, refere.

Nia relata durante tinan ida-ne’e mosu emerjénsia hanesan mota Natarbora, agora daudaun proseau konkursu sei la’o, ponte Welolo mosu sedimentasaun hadia hotu, ponte Uani-Uma ne’ebé foin lalais kotu agora sei iha prosesu konkursu públiku hodi hadia fali ponte, maibé prosesu ba ponte Beaço ne’ebé kotu to’o agora seidauk prosesa.

“Ponte Beaço nian ne’e maka foin lalais ami kordena ho adiministrasaun munisípiu Viqueque dehan adiministrasaun Viqueque iha orsamentu. Entaun join ho ami (MOP) apoiu tula besi iha ponte leten no munisípiu maka tau orsamentu hodi halo konstrusaun, maibé liga ba prosesu adiministrasaun ba aprozionamentu tempu mós laiha ona. Tan ne’e la konsege hadia ponte Beaço nian, maibé ita kontinua hein hosi nasionál”, adianta

Jornalista: Vitorino Lopes da Costa
Editór : Zezito Silva

iklan
iklan

Leave a Reply

iklan
error: Content is protected !!