iklan

NASIONÁL, POLÍTIKA

Brunei-Singapura-Malázia-Xina hakarak investe iha Timor-Leste

Brunei-Singapura-Malázia-Xina hakarak investe iha Timor-Leste

Embaixadór Brunei Darusalam, Abél Gutteres. Imajen/Doc. Tatoli.

DILI, 14 novembru 2022 (TATOLI)—Embaixadór Brunei Darusalam, Abél Gutteres, informa nasaun lima (5) hanesan Brunei, Malazia, Singapura, Filipina no Xina hakarak investe iha Timor-Leste iha área turizmu, indústria, sentru finansa, edukasaun no Saúde.

“Ohin iha oportunidade, ha’u lori investór sira mai hosi rai Brunei, Malázia, Singapura, Filipina no Xina. Sira mai hosi organizasaun ida naran Oborsiana, sira iha sira-nia rede ne’ebé kompañia sira bele halo investimentu. Entaun, sira mai iha ne’e hasoru malu ho Xefe Estadu, bo hasoru malu ho Primeiru-Ministru no mós sei iha oportunidade atu hasoru malu ho Ministru sira seluk se iha tempu, tanba agora ne’e iha debate Orsamentu Jerál Estadu 2023, iha Parlamentu Nasionál,” Abél Gutteres informa ba jornalista sira, bainhira halo enkontru ho Prezidente Repúblika, José Ramos Horta, iha Palásiu Prezidensiál Nicolau Lobato, Bairru Pite, Dili, segunda ne’e.

Tuir nia, investidór sira-ne’ebé atu investe iha Timor-Leste, sira hakarak investe iha área Turizmu, Indústria hanesan Fábrika no Sentru Finansa hanesan sira loke banku atu osan investimentu sira mai.

“Ida seluk kona-ba edukasaun no treinu, tanba rekursu humanu ne’e importante, tanba ó bele osan barak maibé laiha ema servisu ne’e la di’ak no ikus mak iha área saúde tanba se turista sira aban bainrua barak mai presiza iha ospitalidade, kualidade hanesan Austrália no Singapura atu ema ne’e fiar dehan se buat ruma akontese ba sira, sira iha fatin ida bele kuidadu sira-nia saúde. Ida-ne’e sei hola parte hosi investimentu sira-ne’e hotu,” nia esplika.

Aliende ne’e, iha enkontru ne’e Haji Inacir fó hanoin ba Prezidente Repúblika kona-ba Timoroan sira atu ba servisu iha Brunei.

“Oras ne’e daudauk prosesu ne’e sei la’o hela iha sistema Governu Brunei nian. Bainhira sasán kompletu hotu, ita-nia ema, aviaun Brunei nian sei mai foti iha Timor lori ba servisu. Ida-ne’e hanesan primeira ronda. Agora, ita-nia oan sira-ne’ebé tau ona naran halo ona entrevista sira iha ona lista atu ba Bruniei, ne’e aguenta tan uitoan, tanba sistema iha Brunei sei la’o hela. Tanba ne’e, la’os ko’alia ema ida no rua de’it maibé ema barak. Entaun, komu ema barak sistema Governu nian tenke halo prosesu ne’e la’o di’ak, atu ita-nia ema sira ba servisu iha Brunei, sira tenke ba iha ne’ebá tinan rua (2) mak fila,” nia dehan.

Nia esplika, timoroan sira ne’ebé atu ba servisu Brunei, iha área hospitalidade, Hotel, restaurante, konstrusaun, agrikultura no área óliu no gás ka mina.

Purtantu, posibilidade sira-ne’e iha maibé sistema ne’e depende ba ema kontratu-na’in sira iha Brunei husu, entaun Timor-Leste simu, ne’ebé hein katak prosesu ne’e sei la’o di’ak no lalais no fulan tuir mai aviaun bele mai foti timoroan sira husi Timor ba loos Brunei lalika liuhosi dalan seluk.

Ne’ebé, ida-ne’e hanesan preparasaun ne’ebé agora ita halo maibé ita-nia investór sira-ne’e iha loron rua (2) ami konsentra iha Baucau, tanba Baucau ne’e dezde uluk kedas baze Turizmu, indústria Turizmu mak sei fó servisu barak ba ema, la’ós servisu de’it. Maibé, entremus edukasaun, formasaun prepara ema atu servisu iha Indústria no Turizmu ninian, hanesan Hotel, Restaurante,” nia dehan.

Tuir nia, delegasaun ne’e kontente tebes tanba mai hasoru malu ho Xefe Estadu, Governu no mós autoridade Baucau, atu sira rasik haree ho matan no ko’alia ho Xefe Suku sira, Prezidente autoridade munisípiu ho administradór postu administrativu.

“Entaun, ida-ne’e hanesan hatudu konfiansa katak povu Timor-Leste hakarak simu investidór sira mai hosi li’ur mai investe iha ita-nia rain, hodi fó servisu ba ita-nia oan sira atu sira la presiza ba rai sira seluk. Tanba, ba rai sira seluk ne’e la’ós la di’ak maibé di’ak tanba dahuluk sira ba manán osan no daruak sira ba manán esperiénsia atu mai fali halo servisu. Aleinde ne’e, ba investidór sira mós kontente tanba iha ona ema-ne’ebé matenek servisu iha área turizmu nian, ida ne’e sira gosta,” nia hateten.

Kona-ba traballadór atu ba servisu iha Brunei ne’e responsabiliza hosi Governu ka Ajénsia, nia hatán, ida-ne’e parte Ajénsia no Governu servisu hamutuk.

“Agora importante ita-nia ema sai ne’e, nia tenke iha naran, iha ona servisu mak nia sai. Nia labele naran sai arbiru de’it. Nia tenke tuir formasaun no iha sertifikadu, tanba ema-ne’ebé ba servisu ne’e tenke treinu tiha ona, ninia matenek ne’e iha tiha ona mak ema Brunei bele simu, se lae ema la simu,” nia dehan.

Timoroan ba servisu iha Brunei, organizasaun ne’e halo asina akordu ona ho Sentru ETDA, sentru formasaun Tibar, Becora, Maliana, sentru Canossa Baucau no sira seluk tan.

“Ida-ne’e importante, tanba sira iha ona koneksaun, agora ita hein sasán la’o, desde prosesu sistema ne’e la’o loos hotu ona kapaas. Tanba, estimasaun, timoroan atu ba Brunei, sira (Brunei) presiza ema rihun 25,” nia dehan.

Jornalista : Nelia Fernandes

Editór       : Cancio Ximenes

iklan
iklan

Leave a Reply

iklan
error: Content is protected !!