iklan

DILI, POLÍTIKA

Deputadu CNRT kestiona programa “Eskola iha Uma”

Deputadu CNRT kestiona programa “Eskola iha Uma”

Situasaun iha diskusaun proposta orsamentu OJE, iha sala plenáriu PN, segunda (14/11/2022).Imajen Tatoli/António Daciparu

DILI, 14 novembru 2022 (TATOLI)—Deputadu Congresso Nacional de Reconstrução Timorense (CNRT), Gabriel Soares, kestiona programa orsamentu hosi Ministériu Edukasaun Juventude no Desportu (MEJD) kontinua aloka iha 2023.

Deputadu ne’e halo proposta atu hasai $2.126.250 iha programa edukasaun no formasaun, sub-programa jestaun no akreditasaun pre-eskolár, atividade expansaun eskola iha uma ho justifikasaun OJE ratifikativu 2022 aprova ho orsamentu $1.890.800.00 ba programa “Eskola iha Uma” maibé to’o agora seidauk ezekuta, nune’e dúvida ho kapasidade programa ne’e ba mellora aprendizajen estudante iha pandemia COVID-19.

Nune’e, nia husu atu tau re-aloka fila orsamentu refere ba iha programa no sub-programa hanesan maibé nia atividade mak altera ba prestasaun serbisu profisionál iha ensinu pre-eskolár.

“Halo proposta ne’e bazea ba realidade ne’ebé iha bainhira debate orsamentu ratifikativu 2022 MEJD mai ho nia programa ida husu orsamentu tau iha programa eskola ba uma katak urjente nune’e PN aprova orsamentu destina millaun $1.8. Maibé realidade ezekuta programa ida-ne’e la la’o no bainhira debate jeneralidade Ministru Edukasaun hato’o seidauk ezekuta maibé espesialidade kolega deputadu seluk husu implementa ona ida-ne’e hatán ‘sim’ ka ‘lae’, entaun ami haree iha livru orsamentu (2023) tau nafatin programa eskola iha uma husu tan,” nia hato’o iha debate proposta OJE 2023 iha PN, segunda ne’e.

Nia dehan programa ne’e seidauk ezekuta, livru manuál, kuríkulu eskola ba uma laiha no foin halo rekrutamentu ba profesór laiha.

“Tanba ne’e proposta ne’e iha fatin la’o lai ba orsamentu 2022 nian, nia persentajen kiik-oan la’o tiha lai ba abanbainrua iha governasaun ida mai fali mak mai fali husu iha retifikativu, agora ida ne’e seidauk la’o ita la haree nia ezekusaun iha 2023 husu tan orsamentu atu halo saida,” nia dehan.

Deputadu opozisaun ne’e husu ministéiru atu tau atensaun programa ne’ebé esensiál liu tanba  hanesan profesor retroativu atrazu, destinu profesor kontratadu to’o agora laiha resposta.

“Presiza haree uluk ida-ne’e hodi dudu edukasaun aloka lai orsamentu ba depois mak ita haree ba fali eskola ba uma ne’e,” nia hateten.

Proposta seluk hosi Deputadu PD, Elbina Sousa, Ernesto Fernades ‘Dudu’  hato’o atu hasai $100.000 hosi Ministéiru Turizmu Komérsiu no Indústria (MTKI) iha programa turizmu atu tau fali ba iha MEJD programa igualidade jéneru no inkluzaun, sub-programa edukasaun inkluzivu no polítika jeneru ba atividade implementa polítika nasionál edukasaun inkluziva.

“Ami hanoin haree importánsia inkluziva iha MEJD rasik liu-liu formasaun ba ita-nia manorin-na’in sira-ne’ebé iha eskola sira iha mós ita-nia maluk nesesidade espesiál,” Elbina Sousa hateten.

Prezidente Komisaun G trata asuntu edukasaun, António Verdiál, hateten la kestiona ba proposta ne’e maibé husu órgaun ezekutivu tutela rezolve lai profesór kontratadu parsiál no voluntáriu, infraestrutura eskolár iha territóriu, konversaun eskola ensinu sekundáriu jerál ba tékniku vokasionál iha rekursu umanu ho manorin-na’in kualifikadu.

Ministru Edukasaun Juventude no Desportu (MEJD), Armindo Maia, hatetetn programa eskola iha uma ba tinan ne’e nia prosesu mak rekruta ona profesór no semana kotuk asina nota akordu ida ho Governu Nova Zelandia atu ezekuta orsamentu millaun $1-resin atu sosa materiál didátiku, bibliotéka movel, fó formasaun professor, nune’e to’o tinan ne’e ramata bele ezekuta ho di’ak.

“Ba tinan oin mai planu ministériu ninian mak expande tan ba munisípiu tolu programa eskola iha uma ne’ebé nia orsamentu millaun $2-resin no orsamentu ne’e atu rekruta tan profesór serka 3000 ho nesesidade sira seluk,” nia esplika.

Tan ne’e, programa ‘Eskola iha Uma’ ne’e importante bele konsidera retira proposta.

Governante ne’e hateten, kona-ba proposta daruak apresia maibé ministériu iha programa igualidade jéneru inkluzaun, tinan ne’e iha orsamentu aumenta boot tebes tan ne’e orsamentu naton atu fó formasaun manorin na’in ba ema ho ema defisiénsia.

Governante ne’e hateten, kona-ba profesór kontratadu iha 4902 nia prosesu atu halo ingresu espesiál desde iha fulan-juñu kedas prosesu legál la’o ona rezolusaun finál seidauk espera tempu badak no tinan oin, bainhira sira pasa ba permanente orsamentu prevee ona iha 2023 millaun $4-resin ba sira-nia saláriu.

Mezmu hetan ona esplikasaun hosi MEJD maibé proponente sira nafatin defende katak mantein ho proposta hodi avansa ba votasaun maibé la pasa.

PN halo aprovasaun ba proposta-lei OJE 2023 ba MEJD $122.249.822 iha espesialidade ho votu a-favór 38, kontra ida no abstensaun 21.

Orsamentu ba tinan ne’e hodi implementa programa boa-governasaun no jestaun instituisionál $12.957.820, programa edukasaun no formasaun $108.398.173, programa igualidade jéneru no inkluzaun sosiál $893.829

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!