Governu promete sei kontinua implementa PMOPA iha 2023

COVALIMA, 14 novembru 2022 (TATOLI)–Governu liuhosi Vise-Ministériu Administrasaun Estatál (MAE), Lino de Jesus Torrezão, promete sei kontinua implementa Programa Mão de Obra Postu Administrativu (PMOPA) iha tinan fiskal 2023, tanba hakarak osan sirkula de’it iha rai-laran la’ós sirkula fali iha rai-li’ur.

“Hakarak implementa nafatin PMOPA ne’ebé programa mai hosi MAE ne’ebé balun sei  kontinua implmenta. PMOPA iha postu Maucatar finaliza ona implementa faze dahuluk no daruak maibé relatóriu la tama no osan la mai tán,” Vise-Ministru Administrasaun Estatál (MAE), Lino de Jesus Torrezão, hatetetm iha postu administrativu Maucatar, segunda ne’e.

Governante ne’e husu atu submete relatóriu tenke sedu no tenke halo loloos, identifika no hili komunidade ne’ebé hetan ona servisu tenke troka malu no haruka komunidade seluk hetan fali tanba ema hotu-hotu ne’e mesak komunidade.

Administradór postu administrativu Maucatar, Constantino do Carmo, hatutan lia-menon hosi komuminidade ba vise-ministru administrasaun estatál atu kontinua implementa Programa Mão de Obra Postu Administrativu (PMOPA).

“Mensajen hosi povu, ami hakarak PMOPA ba oin nafatin. Loos, ita-sei kontinua nafatin implementa programa PMOPA, imi sei servisu no laiha ida mak taka PMOPA. Ha’u fiar VIII Governu Konstitusionál sei kontinua implementa PMOPA, nune’e komunidade bele hetan osan,” nia hateten.

Ho implementasaun PMOPA ne’e, autoridade postu adminustrativu Maucatar esforsu hodi hatudu nia rezultadu, tanba hamoos estrada hahú hosi Suai to’o baliza ho postu administrativu Fatululik.

“Ita-boot sira haree rasik obra ne’ebé ami-nia povu hatudu, hahú hosi Suai to’o baliza ho postu administrativu Fatululik. Ha’u konvida vise-MAE ho diretór sira bele vizita tanba uluk estrada aat,” nia dehan.

Tuir dadus, durane implementa PMOPA rekruta traballadór faze dahuluk ne’e trabaldór na’in-340 no faze daruak rekrutra traballadór na’in-840.

Jornalista : Celestina Teles

Editór       : Cancio Ximenes