COVALIMA, 14 novembru 2022 (TATOLI)–Prezidente komisaun organizadóra, João Gusmão informa, komemora loron nasionál proklamasaun independénsia Timor-Leste, postu administrativu Maucatar provizóriu foku realiza de’it serimónia isar bandeira.
“Ha’u hanoin komemorasaun 28 novembru ne’e, sei haree hosi orsamentu durante ami foku de’it isar bandeira no durante ne’e la realiza atividade seluk. Depende osan ne’ebé mai, ami sei haree lai. Maibé ba tinan ne’e nafatin hanesan tinan uluk, ami foku de’it ba isar badeira de’it no atividade seluk laiha,” João Gusmão hateten ba jornalista sira, iha postu administrativu Maucatar, segunda ne’e.
Iha ambitu komemorasaun loron 28 novembru iha postu administrativu Maucatar provizóriu sei foku ba atividade isar bandeira, maibé komisaun organizadora ho nia estrutura mós sei hala’o enkontru daruak atu deside atividade sira-ne’ebé atu realiza.
“Ha’u hanoin kona-ba atu realiza atividade sei hala’o tan enkontru bazea ba esperiénsia orsamentu komemora loron 28 novembru kada tinan, ba postu administrativu aloka hosi munisipiu ho montante $750.00 de’it,” nia dehan.
Maske komemora loron 28 novemnru ho de’it orsamentu $750, maibé líder komunitária sira sei organiza komunidade hosi suku haat, hodi partisipa serimónia isar bandeira iha postu administrativu Maucatar.
“Orsamentu atu to’o ka lato’o, ami iha inisiativa ida katak hodi organiza ami-nia komunidade hosi suku Ogues, Matai, Belekasak no Holpilat,” nia hateten.
Tanba, enkontru dahuluk hodi Forma Komisaun organizadora hodi hili prezidente, vise no mós forma ona seksaun sira hanesan konsumsi, lojistika, dekorasaun asuntu importante sira maske la hala’o atividade boot.
Jornalista : Celestina Teles
Editór : Cancio Ximenes
