DILI, 14 novembru 2022 (TATOLI)-–Lixu non orgániku hanesan fatin-bee mamuk, plástiku no seluk tan nakonu iha odamatan VIP Aeroportu Internasionál Prezidente Nicolau Lobato, Comoro.
Ba kestaun ne’e, Prezidente Konsellu Administrasaun Aeroportu no Nevegasaun Aérea Timor-Leste, Empreza Públika (ANATL, E.P), José Trindade da Cruz Pinto, hateten, lixu sira kauza hosi udan-boot iha domingu (13/11).
“Loos duni iha lixu, lixu sira mai para iha ne’e tanba udan horiseik. Maibé obrigada tanba fó hanoin ona, ha’u sei kontaktu empreza sira ne’ebé mak responsabiliza ba ida-ne’e,” José Trindade informa ba Agência Tatoli via telefónika, segunda ne’e.
Notísia relevante: AMD hili Motael sai suku ne’ebé moos hosi lixu no ALFA
Tuir observasaun Agência Tatoli iha terrenu, nota katak iha tuku 09:00 maibé empreza ne’ebé responzabiliza seidauk hamoos lixu.
Tuir Prezidente Konsellu Administrasaun ANATL, E.P, durante ne’e iha empreza rua mak hamoos iha Aeroportu Comoro.
“Ida limpeza esternál ne’e mak empreza TLK no limpeza internál ne’e PAX, maibé ha’u hakarak fó obrigadu ba jornalista Tatoli tanba fó hanoin ona, ha’u telefone sira agora,” nia akresenta.
Bainhira Prezidente Konsellu Administrasaun ANATL, E.P liga ba ekipa responsável, nune’e liu minutu balun sira hahú hamoos resintu Aeroportu Comoro.
Jornalista : Antónia Gusmão
Editora : Julia Chatarina
