MAE husu autoridade Covalima aselera konstrusaun UKL faze daruak

COVALIMA, 14 novembru 2022 (TATOLI)—Vise-Ministru Administrasaun Estatál, Lino de Jesus Torrezão husu ba autoridade Covalima liuhosi líder komunitária atu fasilita hodi aselera konstrusaun Uma Kbiit Laek (UKL) faze daruak iha munisípiu Covalima.
“Ha’u triste uitoan konstrusaun Uma Kbiit Laek (UKL) faze daruak, iha Iliomar-Lautém, ha’u inaugura ona maibé iha ne’e seidauk akontese. Ha’u liu ba-mai, foin mak haree fatuk butuk hamutuk maibé iha munisípiu Liquiça mós besik atu hotu ona. Ha’u husu Covalima atu aselera uitoan ba administradór postu no xefe suku sira organiza oinsá ,tanba tuir lei xefe suku la presiza kaer osan”,” Lino de Jesus Torrezão hatetetn liuhosi diskursu bainhira inaugura edifísiu postu administrativu Maucatar, segunda ne’e.
Konstrusaun UKL faze daruak ne’ebé inaugural, sira hala’o servisu durante loron 40 de’it maibé bele inaugura ona, tanba ne’e sai hanesan ezemplu ba munisípisu sira seluk, servisu durante loron 40 de’ir bele inaugura ona.
“Iha Iliomar, ha’u inaugura ona. Iha suku Fuat halo konstrusaun UKL durante loron 40 de’it, tuir loloos fatin hotu hanesan ne’e maibé tanba situasuan no kondisaun rai, fasilidade no fornesedór, ita lahatene balun iha osan no laiha osan,” nia hateten.
Administradór postu administrativu Maucatar, Constantino do Carmo infroma, konstrusaun UKL faze dahuluk tinan fiskal 2021 finaliza ona no agora hahú atu konstrui UKL faze daruak tinan fiskal 2022.
Nia hato’o agradesimentu ba Gobernu liu-liu MAE ne’ebé implementa programa mak hanesan konstrusuan edifisiu ne’ebé kompañia entrega ona, UKL tinan 2021 finaliza ona
“Konstrui UKL faze daruak ba tinan fiskal 2022 ita agora prosesu foin mak tau hamutuk fatuk, ho nune’e iha tinan ne’e sei konstrui uma 111,” nia hateten.
Bazea dadus ne’ebé Agência Tatoli asesu katak konstrusaun UKL faze daruak tinan fiskal 2022 sei konstrui UKL hamutuk 270 ne’ebé sei implementa iha postu administrativu hitu (7) ho nia suku 30 iha munisípiu Covalima.
Jornalista : Celestina Teles
Editór : Cancio Ximenes

