DILI, 14 novembru 2022 (TATOLI)-Reprezentante povu Deputadu sira iha Parlamentu Nasionál (PN) aprova proposta Orsamentu Jerál Estadu (OJE) 2023 iha espesialidade ba Sekretária Estadu Formasaun Profisional no Empregu (SEFOPE) ho votu a-favór 40, kontra 0 no abstensaun 20.
“Nune’e, Orsamentu Jerál Estadu (OJE) 2023 ba SEFOPE aprovadu,” Prezidente PN, Aniceto Longuinhos Guterres Lopes, hateten iha ambitu debate proposta OJE 2023 faze espesialidade ba loron datoluk iha sala plenária, segunda ne’e.
Iha debate ne’e deputadu sira aprezenta proposta ida atu hasai osan hosi dotasaun jerál Estadu millaun $2 ba iha SEFOPE hodi bele oinsá apoiu formasaun téknika no língua ba joven sira.
Deputada proponente, Angelina Sarmento, hateten proposta ne’e atu bele fó formasaun ba ita-nia joven iha téknika no língua tanba ita hotu hatene ita-nia timoroan hanesan ba to’o iha portugál hasoru problema, nune’e proposta ne’e oinsá Estadu fó intervensaun hodi fó formasaun ba asesu ba kampu traballu sira bele iha kondisaun, tanba agora sira barak laiha kuiñesimentu.
“Tanba ne’e, ami hanoin tau millaun $2 pretende hasai hosi ASEAN iha ne’ebé tau millaun $5 ami hasai tiha millaun $2, maibé foin lalais antes proposta seidauk iha maibé ho loron hirak liu ba lidér ASEAN fó sai ona ita-nia submisaun, nune’e ami deside retira fali prosposta ne’e atu koa osan hosi ne’e,” nia esplika.
Nune’e, proponente deside retira proposta maibé husu Governu bele buka fonte orsamentu hodi fornese posibilidade iha kala’e hosi rezerva kontijénsia atu bele atensaun ba kestaun joven sira-nian.
Proposta OJE 2023 SEFOPE prevee $5,116,172, ho programa dezenvolvimentu rurál no urbanu prevee $494,532 ho sub-programa reforsa serbisu SEFOPE iha munisípiu no exteriór ho atividade ida.
Programa boa-governasaun no jestaun instituisionál prevee $1,676,166 ho sub-programa rua no atividade sira.
Programa igualidade jenéru no inkluzaun sosiál prevee $24,462 ho sub-programa ida no atividade rua.
Programa investimentu no diversifikasaun ekonómika prevee $2,740,22 ho sub-programa estratéjia nasionál empregu ho atividade tolu, sub-programa informasaun nasionál kona-ba mão-de-obra no merkadu ho atividade rua, sub-programa kria oportunidade empregu ho atividade neen, sub-programa sertifikasaun instituisaun (sentru formasaun) ho atividade tolu, sub-programa relasaun serbisu ho atividade rua.
Jornalista : Nelson de Sousa
Editór : Cancio Ximenes
