iklan

DILI, POLÍTIKA

PN aprova OJE 2023 ba MNEK iha espesialidade ho votu a-favór 40

PN aprova OJE 2023 ba MNEK iha espesialidade ho votu a-favór 40

Primeiru-Ministru, Taur Matan Ruak, partisipa diskusaun proposta-lei OJE 2023, iha sala plenária PN, segunda (14/11). Imajen Tatoli/António Daciparu

DILI, 14 novembru 2022 (TATOLI)—Reorezentante povu iha Parlamentu Nasionál (PN), segunda ne’e, aprova proposta-lei Orsamentu Jerál Estadu (OJE) 2023 ba Ministéiru Negósiu Estranjeiru no Kooperasaun (MENK) iha debate espesialidade ho votu a-favór 40, kontra 0 no abstensaun 22.

“Nune’e Orsamentu Jerál Estadu (OJE) 2023 ba MNEK pasa,” Prezidente Parlamentu Nasionál, Aniceto Longuinhos Guterres Lopes, hateten iha debate proposta-lei OJE 2023 iha faze espesialidade ba loron datoluk iha sala plenária.

Iha debate ne’e deputadu Fretilin, José Agostinho Sequeira ‘Somotxo’, hato’o proposta ida hodi husu hasai millaun $1 hosi títulu Ministéiru Petróliu no Minerál (MPM) hodi aloka fali mai iha MNEK.

Somotxo esplika, sentidu proposta ne’e tuir nesesidade atendimentu ba protokolár, kapasitasaun diplomata tanba tinan oin Timor-Leste adere ba ASEAN, instalasaun konsolár iha Irlandia  inklui konsolár ne’ebé prosesu hela hanesan India ho Emirates Arabe.

“Ita fó prioridade ba Irlandia tanba ita-nia sidadaun sai ba ne’eba barak, entaun komisaun B (trata asuntu Negósiu Estranjeiru no Defeza ho Segurnasa) haree presiza ita-nia reprezentasaun diplomátika, hanesan mós fatin sira seluk. Tan ne’e, proposta ne’e importante ba MNEK,” Prezidente Komisaun B ne’e hateten.

Deputadu KHUNTO, Luis Roberto, hateten komisaun B nia fiskalizasaun loos duni tanba timoroan tau iha exterior ne’eba enfrenta buat oioin hanesan dalabarak hosi órgaun soberania sira ba iha ne’eba hanesan iha Bali-Indonézia aluga de’it karreta, ida-ne’e Governu tenke haree  no aumenta ho rekursu umanu hodi halo atendimentu di’ak tanba dalaruma iha ema na’in-ida ka rua.

Ministru Petróliu no Minerál (MPM), Victor da Conceição, hateten relativamente ho pedidu atu hasai osan hosi MPM hanoin laiha fatin tanba prosesu orsamentál to’o iha ne’e hanesan iha lei Grande Opsaun Planu (GOP) mai to’o iha ne’e, no haree ezekusaun OJE 2022 ministériu nian di’ak tebes 90%-resin.

“Nesesidade orsamentu alokadu mai hosi Grande Opsaun Planu (GOP) no planu ezekuta tuir planu ministériu iha kona-ba akizisaun edifísiu instituisaun tutela ne’ebé namkari hodi tau hamutuk. Tanba ne’e, orsamentu sira-ne’e definidu hotu, nune’e labele hasai hosi verba ida-ne’e,” nia esplika.

Nune’e, proponente deside retira proposta maibé sujere Governu atu konsidera hodi tau atensaun.

Iha proposta-lei OJE 2023 ne’e, Ministériu Negósiu Estranjeiru no Kooperasaun (MNEK) prevee ho montante $28,370,273.

Tuir livru anexu XI planu anuál ba serbisu no entidade setór públiku administrativu, iha 2023,   MNEK iha programa polítika externa Timor-Leste prevee $22,814,546 ho sub-programa defende no promove interrese TL iha rai-li’ur ho atividade reprezentasaun TL nivél bilaterál, rejionál no multilaterál, sub-programa kooperasaun ba dezenvolvimentu ho atividade asegura sistema administrativu no operasionál, sub-programa koordensaun asuntu bilaterál no multilaterál ho atividade vizita Estadu, vizita ofisiál serbisu, sub-programa fasilita no koordenasaun institusionál iha ezekusaun polítika externa ho atividade tolu.

Sub-programa reforsa no fortalese jestaun no reprezentasaun asuntu kárater multilaterál no rejionál ho atividade rua, sub-programa jestaun koordenasaun asuntu bilaterál ho atividade rua.

Programa boa-governasaun no jestaun instituisionál prevee $ 5,555,727 ho sub-programa tolu no atividade hitu.

PN aprova dotasaun jerál Estadu $261.439.805

Aleinde ne’e, deputadu sira mós aprova iha espesialidade orsamentu dotasaun jerál Estadu ho votu a-favór-37, kontra ida no abstensaun 21.

Tinan oin orsamentu dotasaun jerál Estadu tau $261.439.805 hodi prevee ba programa ualu (8).

Programa jestaun finansa públika prevee $28.973.620, programa dezenvolvimentu rurál no urbanu prevee $177.200, programa kontijénsia millaun $66, programa polítika externa Timor-Leste $11.987.668, programa boa-governasaun no jestaun instituisional $40.830.000, programa saúde $2.092.400, programa igualidade jeneru no inkluzaun sosiál $98.860.306, programa investimentu no diversifikasaun ekonomika $12.518.611.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!