iklan

DILI, POLÍTIKA

PN ko’a millaun $4-resin hosi Ministériu Finansa iha OJE 2023

PN ko’a millaun $4-resin hosi Ministériu Finansa iha OJE 2023

Votasaun proposta OJE 2023 iha sala plenáriu Parlamentu Nasionál, segunda (14/11). Imajen TATOLI/Francisco Sony.

DILI, 14 novembru 2022 (TATOLI)—Deputadu sira iha Parlamentu Nasionál (PN) iha diskusaun proposta Orsamentu Jerál Estadu (OJE) 2023 iha espesialidade hato’o proposta deside ko’a millaun $4-resin hosi Ministériu Finansa (MF).

Hanesan proposta númeru 27 títulu Ministériu Finansa iha programa jestaun finansa públika, sub-programa arekadasaun impostu no taxa hasai $1.500.000 no programa boa-governasaun no jestaun instituisional, sub-programa jestaun instituisionál hasai $1.500.000, nune’e totál millaun $3 hodi tau ba iha Ministériu Petróliu no Minerál (MPM) iha programa jestaun rekursu petrolíferu no minerál, sub-programa kompañia nasionál mineira nia atividade estabelesimentu no operasionalizasaun kompañia nasionál.

Proposta ne’e aprezenta hosi Maria Angelica Rangel (Fretilin), Antoninho Bianco (Fretilin), António da Conceição (PD) ho justifikasaun sumária kompañia mineira Timor-Leste S.A. kriasaun iha 08 juñu 2022 liuhosi dekretu-lei númeru 43/2022 ho objetivu realizasaun atividade mineira define iha lei inklui atividade rekuiñesimentu, prospesaun no peskiza, avaliasaun, dezenvolvimentu, explorasaun, tratamentu, transporte no komersializasaun minerál. Númeru investidór provadu ho interrese aposta iha explorasaun rekursu minerál disponivel iha territóriu nasionál aumenta ne’ebé aumentu lisensa atribui ba ezekusaun atividade.

Nune’e, proposta alterasaun ne’e hanesan investimentu no finansiamentu ba atividade minerál realiza akordu ho planu estratéjiku ne’ebé define.

“Proposta númeru 27 depois ami halo audénsia ho Ministéiru Finansa liu hosi Vise Ministru  baze mak kaer ba ezekusaun ministériu nian 55%. OJE tinan ne’e, ho hanoin ida-ne’e depois ami mós halo audiénsia ho Ministériu Petróliu no Minerál (MPM), hanesan ho aprovasuan lei kódiku mineiru liu ba ho hanoin ida-ne’e, ami haree verba kompañia mineiru Governu laiha tau verba orsamentu. Nune’e, ami hanoin hakarak halo alterasaun tanba kapasidade la to’o no hodi selu asesór na’in-90 iha Ministériu Finansa, nune’e ami husu atu bele hasai,” Maria Angelica fundamenta.

Proposta númeru 64 aprezenta hosi deputadu Maria Angelica Rangel, Antoninho Bianco husu hasai $30.000 hosi programa boa-governasaun no jestaun instituisional hodi tau ba iha títulu serbisu apoiu sosiedade sivíl no auditoria sosiál, programa igualidade jéneru no inkluzaun sosiál, sub-programa finansiamentu sosiedade sivíl ho atividade apoiu organizasaun sosiedade sivíl ba doasaun igreja Builale-Ossu-Viqueque.

Deputada Rangel dehan, proposta ne’e tanba komunidade postu administrativu Ossú, munisípiu Viqueque presiza tebes orsamentu tuir nesesidade hodi bele konklui obra konstrusaun igreja mezmu Primeiru-Ministru rasik deklara ona orsamentu ba igreja aloka hosi fundu ba apoiu direta  konferénsia episkopál.

Proposta númeru 65 títulu MF programa boa-governasaun no jestaun institusionál hasai millaun $1 sei tau ba serbisu apoiu sosiedade sivíl no auditoria sosiál iha programa igualidade jéneru no inkluzasaun sosiál.

Proposta ne’e hosi deputadu Fretilin Maria Anabela Savio, Favião Oliveira, José Augostinho Sequeira ‘Somotxo’, Aniceto Longuinhos Guterres Lopes, Lidia Martins, Mariano Assanami Sabino (PD), Francisco de Vasconcelos (PLP), Olinda Guterres (PLP) katak jornada evanjelizasaun parókia igreja São Paulo Lospalos misa baibain iha domingu hamriik iha li’ur de’it no bainhira misa festa natál, paskua ho loron boot sira seluk dala barak sarani sira hamriik to’o iha estrada laran hodi partisipa misa.

Susar iha tempu udan tanba fatin igreja laran la sufisiente atu hamahan ema hotu, hosi parte sarani sira ho konsiénsia komunidade halibur ona osan rihun $18 maibé kontribuisaun ne’e la sufisiente tanba ne’e komisaun igreja hato’o proposta orsamentu ba iha Governu hodi bele konsidera proposta ne’e.

“Hanoin proposta ne’e tanba bazea ba kontaktu eleitorál no fiskalizaun, sarani sira husu ba igreja kuaze 50% sarani sira presiza tan osan maibé kbiit laiha, nu’udar reprezentante povu ezijénsia pertinente Governu atu ajuda,” Deputadu proponente, Favião Oliveira, hateten.

Ministru Finansa (MF), Rui Augosto Gomes, hato’o katak haree ba proposta tolu ne’e parte Governu rejeita.

“Dahuluk papél responsabilidade finansa boot tebes aliened ita ko’alia polítika makro ekonomia, elaborasaun orsmental, konta Estadu, jestaun fundu petróliu, jestaun patrimóniu, asegura serbisu ba ministéiru tomak no sira seluk tan. Se ita haree hosi  Ministéiru Finansa nia orsamentu iha VIII Governu tinan hirak nia laran halo redusaun drástika ba nia orsamentu. Agora kona-ba alegasaun iha ne’eba asesor 90 ne’e mai hosi ne’ebé, ha’u bele dehan asesór internasionál hamutuk 11 de’it,” nia hateten.

Tanba ne’e, Governante ne’e dehan deputadu sira uza nia kompeténsia atu hasai millaun $4, MF hosi programa boa-governasaun ida-ne’e signifika sei iha implikasaun boot ba kontratasaun ne’ebé hala’o ho funsionáriu, asesória mós sei tun, serbisu ba liña ministériu, RAEOA no munisípiu mós sei tun.

“ita-nia relatóriu kaualidade no tempu atu aprezenta sei tun. Ita-nia ofisina preprasaun ba karreta Estadu sei prezudikadu, tanba ne’e mak ami husu lalika mai halo keixa serbisu Ministéiru Finansa rungu-ranga, kualidade laiha, relatóriu tarde no seluk tan,” nia preokupa.

Primeiru-Ministru (PM), Taur Matan Ruak, subliña katak saida mak Ministru Finansa hato’o atu labele ko’a orsamentu Ministériu Finansa nian no ba oin haree diskusaun bele hetan marjen.

Ministru Ministériu Petróliu no Minerál (MPM), Victor da Conceição, hateten proposta ba empreza mineira, nia elabora iha duni orsamentu millaun $1.250 ne’ebé alokadu antes estabelesimentu empreza ne’e hala’o.

Foin lalais, fulan rua liubá, dekretu-lei ba estabelesimentu aprova no Governu hahú hala’o nomeasaun ba Prezidente organiza grupu ki’ik oinsá atu estabelese, entaun trata dokumentu, lisensa ba estabelese no ba tinan ne’e alokadu orsamentu rihun $600.

“Ba 2023 mak hanesan ha’u dehan Governu aloka millaun $1.250, soké momentu ne’e la’o iha ona inísiu ka meadu ano foin lalais, tanba ami seidauk konsege halo projesaun ida kona-ba planu negósiu ba empreza ida nian. Entaun, planu ne’e empreza tenke halo no empreza foin mak hahú organiza halo ona planu negósiu inisiál prelimináriu,” nia dehan.

Ministru ne’e dehan, depois sira-nia parte reuniaun ho komisaun C (PN) sira hato’o katak iha nesesidade atu aumenta tan fundu investimentu ba tinan oin kuandu empreza ne’e funsiona em plena funsionamentu sira presiza tan orsamentu serka millaun $2 ou $3.

“Tanba ne’e mak nai deputadu aprezenta iha ne’e embora Governu liuhosi GOP katak labele aseita maibé iha duni nesesidade karik iha fundu ruma bele re-aloka. Karik hanoin Ministériu Petróliu no Minerál agradese presiza duni ba investimentu ba 2023 nian hanesan fundu investimentu empreza mineira Timor-Leste,” nia hateten.

Nune’e, hakat ba votasaun proposta ida-idak hanesan proposta númeru 27, ho votu a-favór 33, kontra 12 no abstensaun 17.

Ba proposta númeru 64 a-favór 38, kontra 10 no abstensaun 14, enkuantu proposta númeru 65 ho a-favór 42, kontra hitu no abstensaun 13.

Nune’e, proposta tolu ne’e pasa hotu kedas hodi ko’a proposta orsamentu ne’ebé prevee hosi Ministériu Finansa iha tinan oin.

“Proposta tolu ne’e pasa hotu. Hanesan ohin ita rona preokupasaun hosi Ministru Finansa ho Primeiru-Ministru se presiza rekupera orsamentu hosi MF nian mak liña ministerial. Karik oferese hodi rekupera fali osan ida-ne’e bele ko’alia ho deputadu sira proposta diskusaun tuir mai,” Prezidente Parlamentu Nasionál, Aniceto Longuinhos Guterres Lopes, hateten.

Enkuantu PN halo mós votasaun ba OJE 2023 ba Ministériu Finansa ho alterasaun introduzida ho votu a-favór 41, kontra rua (2) no abstensaun 19 ho nune’e ida-ne’e aprovadu.

Enkuantu, iha proposta-lei Orsamentu Jerál Estadu (OJE) 2023 ne’e, Ministéiru Finansa prevee ho montante inisiál $26,401,967.

Tuir livru orsamentál planu anuál 2023, MF iha Programa jestaun finansa públika prevee $16,222,943 ho sub-programa mobilizasaun jestaun rekursu externu ho atividade neen, sub-programa arekadasaun impostu no taxa ho atividade neen, sub-programa administrasaun fundu petróliu ho atividade rua, sub-programa publikasaun estratéjika no analiza ekonómiku polítiku no fiskál ho atividade neen, sub-programa jestaun patrimóniu Estadu ho atividade neen, sub-programa reforma finansa públika no patrimóniu Estadu ho atividade haat, sub-programa ezekusaun orsamentál no prestasaun konta ho atividade 11, sub-programa planeamentu no orsamentu ho atividade haat.

Programa boa-governasaun no jestaun instituisional prevee $10,179,024 ho sub-programa rua no atividade hitu.

Ministériu Finansa (MF) aprezenta forsa traballu daudaun ne’e iha funsionáriu públiku 634, kontratadu 339, asisténsia tékniku nasionál 80 no asisténsia téknika internasionál 17.

Jornalista : Nelson de Sousa

Editór       : Cancio Ximenes

 

iklan
iklan

Leave a Reply

iklan
error: Content is protected !!