iklan

HEADLINE, MUNISÍPIU, OÉ-CUSSE (RAEOA), SOSIEDADE SIVĺL

Sarani Oé-Cusse entusiazmu simu Kardeál Virgílio ho tradisaun kulturál

Sarani Oé-Cusse entusiazmu simu Kardeál Virgílio ho tradisaun kulturál

Sarani Oé-Cusse entusiazmu simu eminénsia Kardeál Don Virgílio ho tradisaun kulturál. Imajen Tatoli/ Abílio Elo Nini.

OÉ-CUSSE, 14 novembru 2022 (TATOLI) – Sarani sira iha Rejiaun Administrativa Espsiál Oé-Cusse Ambeno (RAEOA), segunda ne’e simu Kardeál Don Virgílio do Carmo da Silva, iha aeroportu internasionál Rota do Sândalo ho tradisaun kulturál.

Hafoin Eminénsia Kardeál Don Virgílio do Carmo da Silva, to’o iha aeroportu Rota do Sândalo ho aviaun ZEESM iha tuku 8:20, simu direita hosi lia-na’in sira, simu ho lian dadolin (takanab), kontinua kedas ho bidu no tebe tradisionál nu’udar tradisaun kulturál Oé-Cusse nian.

Hafoin serimónia kulturál ne’e, sarani Oé-Cusse hamutuk ho Eminénsia Kardeál Dom Virgílio do Carmo da Silva, hala’o vizita hodi deskansa iha parókia Nossa senhora Dorosáriu Numbei Oé-Cusse molok hala’o viajen ba kapela Santa Maria Magdalena Maquelab iha suku Taiboko, sub-rejiaun Pante Makasar.

Ba joranlista sira, Kardeál Don Virgílio do Carmo da Silva SDB, informa, prezensa iha Oé-Cusse sei hamutuk ho sarani sira durante loron-sia, hodi hala’o vizita vigararia ba sarani sira iha parókia sub-rejiaun Nítibe, Pássabe, Oésilo no Pante Makasar.

“Primeiru kada tinan hanesan Bispu, ha’u sempre iha oportunidade hala’o ha’u-nia vizita pastorál ba parókia sira hotu, ne’e duni tinan ida-ne’e ha’u mai halo vizita pastorál iha vigagaria Oé-Cusse, no tinan ida-ne’e ha’u mai mós nu’udar kardeál ninian,” Don Virgílio do Carmo da Silva informa.

Dirijente Igreja Kátolika Timor-Leste ne’e fundamenta, hanesan iha Dili bainhira fila-fali mai hosi Vatikanu, nia parte realiza misa agradesimentu, hamutuk ho sarani sira ba grasa maromak nian, hanesan mós agora daudaun ne’e iha Oé-Cusse mai ho objetivu rua, primeiru mak halo vizita pastorál ba parókia sira hotu iha pertense vigararia Oé-Cusse.

“Ohin, ha’u hahú uluk iha kapela Maquelab, sei liu ba parókia Baoknana, aban no bairua sei liu ba parókia pássabe no kontinua ba parókia Oésilo, parókia Padiae no sei taka iha parókia Numbei Pante Makasar iha loron domingu ne’e,” nia afirma.

Nia agradese ba Maromak tanba haraik grasa no bensaun mai iha Igreja Katolika Timor-Leste sai hanesan grasa kardiál ninian, ida-ne’e hanesan objetivu daruak.

“Hanesan uluk ha’u dehan, grasa ne’e la’ós ba ha’u maibé ba sarani Timor-Leste, entaun ohin ha’u lori grasa ne’e ba sarani Oé-Cusse, nune’e sarani sira mós sente iha pertense grasa ne’ebé simu,” nia katak.

Notísia relevante:  Don Virgílio do Carmo da Silva, Kardeál dahuluk Uma Kreda Timor-Leste

Jornalista   : Abílio Elo Nini
Editór         : Evaristo Soares Martins

iklan
iklan

Leave a Reply

iklan
error: Content is protected !!