iklan

EKONOMIA, BAUCAU, HEADLINE, MUNISÍPIU, POLÍTIKA

Xefe família 846 iha Buruma sai benefisiáriu subsídiu $200

Xefe família 846 iha Buruma sai benefisiáriu subsídiu $200

Xefe suku Buruma, Libório dos Santos Freitas. Imajen Tatoli/Natalino Belo.

BAUCAU, 14 novembru 2022 (TATOLI) – Uma-kain 846 hosi suku Buruma, postu administrativu Baucau Vila, munisípiu Baucau sei simu subsídiu $ 200 iha tinan ida-ne’e.

Xefe suku Buruma, postu administrativu Baucau Vila, Liborio dos Santos Freitas, esplika, hosi totál númeru refere bazea ba dadus hosi Ministériu Solidaridade Sosiál no Inkluzaun (MSSI) ne’ebé antes ne’e simu ona subsídiu iha tinan 2021.

“Lista benefisiáriu maihosi nasionál no ita konfirma ona katak totál 846 mak sei simu osan $200 iha tinan-ne’e ,” Xefe suku Buruma informa ba Tatoli iha Vila Antiga, segunda ne’e.

Autoridade suku Buruma ne’e konsidera ho subsídiu ne’ebé oferese hosi governu bele hakmaan ona povu sira, liuliu utiliza sosa nesesidade bázika hodi hasoru loron boot Natál no tinan foun.

Maske nune’e, seidauk serteza kona-ba loron pagamentu maibé tuir publikasaun, banku sei direita to’o iha suku atu pagamentu ba família agregadu sira iha fulan-novembru ne’e.

Liborio Freitas argumenta, iha xefe família purvolta 10-resin mak naran laiha lista benefisiáriu iha suku Buruma no parte autoridade suku hato’o ona ba MSSI atu konsidera tanba família hirak-ne’e hola parte iha suku Buruma.

“Importante tebes tanba bele ajuda povu atu sosa buat-ne’ebé presiza iha selebrasaun loron boot,” Alexandre da Costa akresenta.

Prosesu pagamentu sei fó-sai hosi Banku Nasionál Komérsiu Timor-Leste (BNCTL, sigla portugés) ne’ebé sei direita paga hosi finansa Ministériu Solidaridade Sosial no Inkluzaun (MSSI), Serbisu Solidaridade Sosiál Munisipál no Pesoál Administrasaun Suku (PAS) ne’ebé hetan observasaun hosi autoridade suku.

Suku Buruma ho totál populasaun hamutuk 3.639 komposta hosi aldeia haat hanesan aldeia Tasi, Casmuto, Ono-sere no Suli-ua.

Jornalista   : Natalino Belo

Editór         : Evaristo Soares Martins

iklan
iklan

Leave a Reply

iklan
error: Content is protected !!