AMC fó pose ba xefe departamentu na’in-15 iha Covalima

COVALIMA, 15 novembru 2022 (TATOLI)–Administradór Munisípiu Covalima, Francisco de Andrade, akompañadu hosi Prezidente Komisaun Funsaun Públika (KFP) Faustino Cardoso fó pose ba xefe departamentu na’in-15 iha munisipiu Covalima.

“Ohin ita fó pose ba xefe departamentu sira ho nune’e total ita-nia xefe departamentu na’in-40 resin ona. Ohin, tuir relatóriu katak na’in-tolu (3) mak ita halo reanunsiu hosi na’in-40 ne’e falta de’it na’in-tolu (3) ita seidauk prenxe, nune’e bele prenxe ona na’in-40. Agradese ba ita-boot sira-ne’ebé ohin simu pose,” Autoridade Covalima, Francisco de Andrade hato’o liuhosi nia diskursu, iha salaun AMC, Sukaer Laran, tersa ne’e.

Autoridade ne’e mós apela ba xefe departamentu sira-ne’ebé simu kna’ar ne’e la’ós oportunidade maibé hanesan responsabilidade, ohin halo ona juramentu no tenke mantein dixiplina. Dala ruma simu pose atu aumenta de’it saláriu, maibé servisu xefe departamentu hanesan tekniku hodi halo planu hanesan funsionáriu sira tama servisu tarde maibé atu fila la tarde.

“Ohin ba oin asume ona kargu ita-boot sira sai ezemplu tanba ita-boot sira la’ós ema foun maibé tuan durante la hetan oportunidade bainhira ita loke teste ida-ne’e iha Dili iha relatoiu ema na’in-64 mak tuir konkursu,” nia dehan.

Maske xefi departamentu na’in-15 simu pose maibé autoridade la hato’o parabens hato’o de’it bom traballu tanba ne’e bainhira kada enkontru koordenasaun munisipal diretór halo aprezentasaun ba planu no ezekusaun no sei to’o mós ba xefi departamentu sira.

Nia husu xefe departamentu sira bainhira atu hala’o servisu labele hein de’it orientasaun hosi diretór sira. Tanba iha juramentu hateten nu’udar servidór hala’o servisu la presiza simu orientasaun mak foin hala’o servisu.

“Iha servisu fatin la’ós uma ne’ebé hakarak tane liman de’it maibé nudar servidór. Saida mak ha’u atu halo maibé futuru Covalima iha ita-nia liman labele dependénsia ba ema ida, ita hotu tenke hamutuk,” nia esplika.

Prezidente Komisaun Funsaun Públiku (KFP), Faustino Cardoso, ho serimónia fó pose ida-ne’e oinsá atu haforsa estrutura administrasaun nia prosesu ida-ne’e liuhosi etapa ne’ebé lidera hosi administradór.

“Ami-nia prezensa hanesan testamuña ba eventu ida-ne’e, eventu ida-ne’ebé ita hotu ni’an klaru sira na’in-15 ne’ebé adminitidu iha prosesu naruk kompetetivu kandidatu 64 hadau vaga 18 no ikus mai na’in-15 de’it mak admitidu,” nia hateten.

Tanba, durante hala’o prosesu rekrutamentu ho kompetividade hala’o ho transparansia laiha fatór sujetivu, tanba hodi KFP nia naran hakarak kongratula administradór ho nia ekipa tomak no kandidatu sira hotu sira partisipa iha prosesu rekrutamentu.

KFP hato’o parabéns ba xefe departamentu na’in-15 ne’ebé hosi númeru ne’e feto na’in-tolu lahatene prosesu oinsá, feto Covalima sei fraku atu tuir prosesu kompetetivu tanba ne’e hanesan servisu ba SEII oinsá atu enkoraja feto sira hodi kumpre dekretu-lei.

Xefe departamentu ne’ebé mak simu pose ne’e mak hanesan xefe departamentu tezoreira no pagamentu Salvadór Alec Cardoso Vicente, xefe depratmentu apoiu Sosiedade sivil Tomas Gomes, xefe departamentu monitorizasaun seguransa alimentár, João Gomes, xefe departamentu jestaun ekipamentu koletivu Rui Lopes.

Xefe departamentu jestaun transporte Jimmy Maria dos santos, xefe departamentu jestaun merkadu Maria de Jesus Pereira, xefe departamentu turizmu Mariano Lopes, xefe departamentu jestaun programa asaun sosiál, Carlos dos Santos Pereira, xefe departamentu planeamentu jestaun ekipamentu protesaun sivil, Rosalino de Andrade.

Xefe departamentu prevensaun sukorru Sabino Amarál, xefe departamentu prevensaun no informasaun Ildefonso da Costa Amarál, xefe depattamentu operasaun emerjánsia José Fátima Xavier, xefe departamentu rejistu nortariadu Filomena Gusmão no xefe departamentu akompañamentu avaliasaun, Adriana da costa.

 Jornalista : Celestina Teles

Editór        : Cancio Ximenes