iklan

BAUCAU, HEADLINE, INKLUZAUN SOSIÁL, MUNISÍPIU

Anin sobu uma-sia iha Lialailesu Caisido

Anin sobu uma-sia iha Lialailesu Caisido

Komunidade nia uma hamutuk sia hetan estragu hafoin akontese anin-boot iha área knua Kaburenu, aldeia Lialailesu, Caisido, suku Tirilolo, postu administrativu Baucau Vila, IHA loron segunda, 14 novembru. Imajen espesiál.

BAUCAU, 15 novembru 2022 (TATOLI) – Anin sobu komunidade nia uma hamutuk xefe família sia iha área Kaburenu, Caisido, aldeia Lialailesu, Suku Tirilolo, postu administrativu Baucau Vila, munisípiu Baucau.

Kazu refere akontese iha loron segunda, 14 novembru purvolta oras 16:00 lokraik ne’ebé rezulta uma komunidade hamutuk sia hetan estragu totál.

“Anin dulas halo uma kakuluk naksobu, kalen anin sobu hotu no didin balun rahun,” Xefe suku Tirilolo, Ricardo Ernesto Belo informa ba Agência TATOLI liuhosi telefónika, tersa ne’e.

Autoridade suku, Ofisiál Polísia Suku (OPS) to’o kedas iha fatin akontesimentu no tékniku Eletrisidade Timor-Leste, empreza publiku (EDTL,ep) normaliza fiu ne’ebé hetan estragu hosi anin boot.

Hosi akontesimentu refere la rezulta ema kanek maibé vítima sira provizoriumente evakua no hela iha família nia uma ne’ebé besik fatin akontesimentu tanba uma hetan estragu.

Diretór servisu munisipál protesaun sivíl no dezastre naturál, Nelson Nunes, hetan ona informasaun hosi autoridade suku no sei fó apoia emerjénsia ba vítima sira hafoin rekolla uma-ne’ebé hetan estragu.

“Ita halo tiha avaliasaun depois kontinua ho apoia emerjénsia,” Nelson Nunes hateten.

Parte protesaun sivíl no dezastre naturál Baucau sei apoia emerjénsia komposta hosi hahaan no la’ós-hahaan hanesan fós, mina, ikan-lata, supermi no susubeen, bikan, kanuru, sana, taxu no seluk tán.

Jornalista          : Natalino Belo 

Editór                 : Evaristo Soares Martins 

iklan
iklan

Leave a Reply

iklan
error: Content is protected !!