DILI, 15 novembru 2022 (TATOLI)—Prezidente Conselho de Imprensa (CI), Virgílio da Silva Guterres, konsidera public speaking importante ba jornalista sira hodi halo servisu liuhosi meiu komunikasaun.
“Ita ko’alia kona-ba public speaking ba jornalista sira, ha’u hanoin importante. Maibé iha buat tolu (3) importante ne’ebé ema komunikatór no mós teoria komunikatór sempre fó hatene katak dahuluk mak gramátika no sá mak public speaking tenke domina gramátika. Se gramátika ne’e aat, se líder ne’e di’ak ne’e la kona malu,” Virgílio da Silva Guterres hateten liuhosi nia diskursu bainhira partisipa iha semináriu public speaking ba jornalista sira iha Pusat Budaya Indonézia (PBI), Mascarenhas, Dili, tersa ne’e.
Tuir nia, hosi aspeitu gramátika iha mós aspeitu daruak mak retorika ne’ebé nia sentidu pozitvu, katak arte ko’alia ho di’ak no lójika.
“Entaun, buat tolu ne’e mak importante ba ita no maluk sira-ne’ebé hakarak sai jornalista, public speaking no mós sai polítiku. Hanesan, horisehik ita akompaña iha Parlamentu oinsá deputadu sira balun raan sa’e ba ulun ba reasaun estudante sira-ne’ebé halo manifestasaun. Maibé totálmente ha’u bele dehan deputadu sira iha buat tolu hanesan gramátika, retorika no lójika ne’e, sira nein domina buat ida. Entaun, ida-ne’e buat importante ne’ebé ha’u hakarak husik hela iha ne’e,” nia dehan.
Maske nune’e, Prezidente Conselho de Imprensa kongratula Telkomcel no Embaixadór Indonézia ne’ebé loke fasilidade ba mídia no jornalista sira atu bele partisipa iha eventu hanesan ne’e no CI prontu atu koopera ho parte hotu, liu-liu ho Embaixadór ka Embaixada Indonézia ka Telkomcel atu nune’e bele fasilita kapasitasaun ba mídia no jornalista sira.
Embaixadór Indonézia iha Timor-Leste, Okto Dorinus, hateten semináriu public speaking ne’e importante ba jornalista sira hodi apreende.
“Ha’u hanoin ida-ne’e importante no ha’u hanoin kolega sira hosi jornalista ida-ne’e la sente defisil, maibé só muda de’it iha nia na’in no maneira de’it tanba estruturamente nia maneira hanoin jornalista di’ak tebes maibé presiza estuda uitoan tan bele sai di’ak ona. Tanba, public speaking ne’e importante tebes ba ita hotu no dala ruma mós ba serimonia familia no festa, tanba ida-ne’e inklui iha parte public speaking ho forma informál,” nia dehan.
Jornalista : Nelia Fernandes
Editór : Cancio Ximenes
