HNGV rekolla reseita rihun $32 iha outubru
DÍLI, 15 novembru 2022 (TATOLI)—Diretór Administrasaun Finansa no Lojistika iha Hospitál Nasionál Guido Valadares (HNGV), Raul Humberto Gama, informa iha fulan-outubru konsege rekolla reseita hamutuk $32.767,40.
“Ita rekolla reseita hosi pasiente estranjeiru no nasional sira ne’ebe mai baixa ka konsulta iha ne’e”, hatete Diretór ne’e ba jornalista sira iha nia kna’ar fatin HNGV-Bidau, tersa ne’e.
Iha fulan-outubru pasiente estranjeiru na’in -84 no nasionál na’in-1.524 mak konsege kontribui reseita liuhosi operasaun, check up no baixa iha sala VIP.
“Enkuantu, iha fulan-setembru rekolla $32.948,37, reseita sira ne’e ita tau iha BNCTL hodi hatama ba kofre Estadu”, katak.
Reseita hirak ne’e rekolla hosi fonte hanesan Departamentu Atestadu médiku,vasina amarela, aluga fatin sentru matan, sentru matan nasionál, pediatria, konoloskopia, bloku operasaun, radiografia, servisu ambulatóriu, maternidade, banku urjénsia, sala VIP, fisioterapia,odentolojia, medisina internál, unidade medical check up, NIFAS, konsulta fuan, unidade urjensia, unidade mortuáriu, hemodialisa no acute care.
Jornalista : Felicidade Ximenes
Editór : Florencio Miranda Ximenes
