DILI, 17 outubru 2022 (TATOLI)—Parlamentu Nasionál (PN) aprova proposta-lei Orsamentu Jerál Estadu (OJE) 2023 ba Ministéiru Planeamentu Ordenamentu (MPO) hamutuk $8,314,298 iha espesialidade ho votu a-favór 41, kontra neen no abstensaun 15.
“Nune’e OJE 2023 ba MPO aprovadu,” Prezidente Parlamentu Nasionál, Aniceto Longuinhos Guterres Lopes, fó sai iha debate proposta OJE 2023 iha espesialidade ba loron dahaat iha sala plenária PN, tersa ne’e.
Hosi montante orsamentu ne’e tinan oin MPO iha programa boa-governasaun no jestaun instituisionál prevee $4,387,022 ho sub-programa lima no atividade 17.
Programa igualidade jéneru no inkluzaun sosiál prevee $123,412 ho sub-programa ida (1) no atividade ida (1).
Programa ordenamentu territóriu prevee $3,803,864 ho sub-programa dezenvolve polítika ordenamentu territóriu ho atividade rua (2), sub-programa dezenvolvimentu no koordenasaun ezekusaun instrumentu planeamentu urbanu ho atividade tolu (3), sub-programa asegura no planea propor polítika nasionál ordenamentu territóriu no dezenvolvimentu territóriu ho atividade tolu (3), sub-programa promove no difundir informasaun jeográfika no kartográfika ho atividade tolu (3).
Entertantu iha debate ne’e, deputadu hosi bankada CNRT halo proposta ida atu ko’a orsamentu hosi MPO maibé iha votasaun la pasa.
OJE 2023 ba MOP aprovadu
Aleinde ne’e, iha debate proposta-lei OJE 2023 ne’e, PN aprova orsamentu ba Ministéiru Obra Públika (MOP) ho montante hamutuk $181.311.256 iha espesialidade ho votu a-favór 42, kontra rua (2) no abstensaun 17.
Montante orsamentu ne’e hodi implementa programa estrada no ponte $40.471.258, programa dezenvolvimenu rurál no urbanu $3.611.246, programa boa-governasuan no jestaun instituisional $16.188.752, programa bee no saneamentu millaun $21 no programa eletrisidade millaun $100.
Notísia Relevante: https://tatoli.tl/2022/10/13/mop-prevee-millaun-181-resin-iha-proposta-oje-2023/
OJE MTK pasa
Nune’e mós, Deputadu sira iha PN aprova proposta OJE 2023 ba Ministéiru Transporte no Komunikasaun (MTK) ho montante $11.558.253 iha espesialidade ho votu a-afavór 40, kontra rua no abstensaun 20.
Orsamentu ne’e implementa programa lima hanesan transporte $2.961.314, programa boa-governasaun no jestaun institusional $16.188.752, programa portu $448.776, programa ingualidade jéneru no inkluzaun sosiál $40.280, programa teknolojia informasaun no komunikasaun $2.289.565.
Enkuantu iha debate ne’e laiha proposta hosi deputadu sira, nune’e hala’o de’it votasaun ba proposta OJE MOP ho MTK.
Notisia Relevante: https://tatoli.tl/2022/10/17/proposta-oje-2023-mtki-prevee-millaun-11-resin-finansia-programa-lima/
Jornalista : Nelson de Sousa
Editór : Cancio Ximenes
